Qazaqstanda jeke adamdar bankrottyǵynyń 3 rásimi qoldanylmaq

ASTANA. QazAqparat – Búgin Májilistiń jalpy otyrysynda «Qazaqstan Respýblıkasy azamattarynyń tólem qabilettiligin qalpyna keltirý jáne bankrottyǵy týraly» zań jobasy men ilespe qujattar birinshi oqylymda maquldandy, dep habarlaıdy QazAqparat tilshisi.

«Zań jobasyn ázirleý barysynda jeke tulǵalardyń bankrottyǵy ınstıtýty qalyptasqan elderdiń ozyq tájirıbesin saralap, ońtaıly normalaryn nazarǵa aldyq. Osy oraıda halyqaralyq tájirıbeni eskere otyryp, rásimderdiń 3 túrin engizýdi usynyp otyrmyz. Birinshi rásim sottan tys bankrottyq is-sharalaryna qatysty. Oǵan azamattar tıisti sharttar boıynsha ótinish bere alady. Atap aıtqanda, bankter, mıkroqarjylyq uıymdar men kollektorlar aldyndaǵy bereshek 4,9 mln teńgeden aspasa, sondaı-aq resmı kirisi joq nemese eń tómengi kúnkóris deńgeıinen aspaıtyn tabysy bolsa (36 018 teńge) sottan tys rásim iske asyrylady. Bul rette boryshkerdiń múlki bolmaýy kerek jáne qaryzdar boıynsha bankpen tıisti rásimderdi júrgizýi qajet», - dedi QR Premer-Mınıstriniń orynbasary-Qarjy mınıstri Erulan Jamaýbaev.

Onyń aıtýynsha, sottan tys bankrottyq tek bankter, mıkroqarjylyq uıymdar jáne kollektorlyq agenttikter aldyndaǵy qaryzdar boıynsha qoldanylýy múmkin. Bul turǵyda «Elektrondyq úkimet» veb-portalynda nemese arnaıy servıstik qosymshalar arqyly ótinim beriledi.

«Sodan keıin, aqparattyq júıe arqyly boryshkerdiń kirý krıterıılerine sáıkestigin anyqtaý maqsatynda múddeli memlekettik jáne basqa organdardyń derekterimen avtomatty túrde salystyrý júrgiziletin bolady. Somasy 4,9 mln teńgeden asatyn qaryzdar boıynsha jáne basqa da bereshek túrleri boıynsha azamattar sot bankrottyǵyna júgine alady.

Bul rásim barysynda boryshkerdiń múlki satylady. Túsken qarajat belgilengen kezekpen kredıtorlar aldyndaǵy qaryzdardy óteýge jumsalady. Eger jalǵyz turǵyn úı kepil zaty bolyp tabylsa, onda kredıtor ony sottyń bankrottyq rásimi kezinde alýǵa quqyly. Jalǵyz baspana kepil bolmasa, kredıtorlar ony talap ete almaıdy», - dedi mınıstr.

Sot bankrottyǵy rásimin qarjy basqarýshylary júzege asyrady. Olar:

• kásibı býhgalterler;

• zań konsýltanttary;

• aýdıtorlar.

«Úshinshi rásim – ol tólem qabilettiligin qalpyna keltirý tártibi, ıAǵnı, turaqty tabys bolǵan jaǵdaıda, qaryzdy óteý úshin sot tártibimen bólip tóleý josparyn alý múmkindigin qarastyrady. Qalpyna keltirý jospary qarjy basqarýshylarmen birlesip ázirlenip, sotpen bekitiledi», - dedi vedomstvo basshysy.

«Jalpy, bankrottyqtyń saldaryna toqtalsaq, qujatta 5 jylǵa nesıe alýdy shekteý eskerilgen. Ekinshiden, azamattar 7 jyldan keıin ǵana bankrottyqqa qaıta júgine alady. Úshinshiden, bankrottyqtan keıin 3 jyl ishinde bankrottyń qarjylyq jaǵdaıyna monıtorıng júrgiziledi. Sol sebepten, azamat ózin bankrot dep jarııalaýdan buryn yqtımal saldary men shekteýler týraly oılaný qajet», - dedi E. Jamaýbaev.