Qazaqstanda jedel tólemder júıesi engiziledi

NUR-SULTAN. QazAqparat - Tsıfrlyq tehnologııalardy retteý jónindegi zań jobasynda jedel tólemder júıesin engizý kózdeledi. Bul týraly búgin Úkimet otyrysynda QR Tsıfrlyq damý, ınnovatsııa jáne aeroǵarysh ónerkásibi mınıstri Asqar Jumaǵalıev aıtty, dep habarlaıdy QazAqparat tilshisi.

«Búgingi kúni elektrondy saýda qarqyndy damýda. Ol úshin kelesi jumystar naqty alǵanda sapaly Internetpen qamtý, tsıfrlyq saýattylyqty kóterý, qolma-qolsyz aqsha tólemderdi arttyrý jasalyp jatyr. Qazirgi ýaqytta 117 qala jáne 250 adamnan astam turǵyny bar 3100-den astam aýyl keń jolaqty mobıldi Internetke qosylǵan. Jyl sońyna deıin turǵyndar sany 250-den asatyn 1000-nan astam aýyldy jyldamdyǵy joǵary mobıldi Internetpen qamtý josparlanǵan», - dedi ol.

Mınıstrdiń aıtýynsha, aýyldarǵa joǵary jyldamdyqty mobıldi Internetti júrgizýdiń jospar-kestesi qurylyp, ol barlyq ákimdiktermen kelisilgen. Sondaı-aq, ótken aptada baılanys operatorlary mobıldi baılanys jelisin birlesip qurý týraly memorandýmǵa qol qoıdy. Elimiz úshin mańyzy zor jobany operatorlar óz qarajaty esebinen iske asyrady. Eldi mekenderdi sapaly baılanys qyzmetterimen qamtý mindeti «Nur Otan» partııasynyń baǵdarlamasyna saı júrgizilýde.

«2021-2022 jyldary 250 adamnan az turǵyny bar 877 aýyldy keń jolaqty Internetke 3G/4G texnologııasymen jáne qalǵan aýyldardy spýtnıktik Internet arqyly qosý jospary bar. Ózderińizge belgili, sapaly Internettiń bolýy xalyqtyń tsıfrlyq saýattylyǵyn arttyrýǵa kómektesedi. Jalpy, bul baǵytta halyqty oqytý baǵdarlamalary qaıta qaraldy jáne bekitildi. Sonymen qatar, halyq arasynda bazalyq tsıfrlyq daǵdylar, EGOV, OPENGOV, E-COMMERCE, jáne aqparattyq qaýipsizdik daǵdylary kýrstary uıymdastyryldy. Atap ótsem, ótken jyly ákimdikter 532 myńnan astam adamdy tsıfrlyq saýattylyqqa oqytty. Ol bıznestiń damýyna, jalpy halyqtyń jaǵdaıyn jaqsartýǵa múmkindik beredi», - dedi Asqar Jumaǵalıev.

Onyń atap ótýinshe, Internet jelisiniń ulǵaıýy jáne tsıfrlyq saýattylyqtyń artýy qolma-qolsyz aqsha tólemderiniń damýyna jol ashty. Nátıjesinde qolma-qol aqshasyz operatsııalar kólemi 2,3 ese ósip, 14,5 trln teńgeni qurady.

»Taǵy bir aıta keterlik jaıt, Tsıfrlyq tehnologııalardy retteý jónindegi zań jobasynda jedel tólemder júıesin engizý kózdelgen. Sonyń arqasynda, qolma-qol aqshasyz tólemder deńgeıi odan ári joǵary qarqynmen artady. Bul otandyq óndiristi damytýǵa, «qarapaıym zattar ekonomıkasyn» qurýǵa oń áserin beredi. Bul baǵytta, Saýda jáne ıntegratsııa mınıstrligimen birlesken jumys júrgiziledi. Jalpy, atalǵan jumys otandyq ónimderge halyqaralyq saýda alańdaryna shyǵýǵa múmkindik beredi. Ol halyqqa, elimizdiń ekonomıkasynyń damýyna qosymsha áser beredi«, - dedi ol.