Qazaqstanda jaıylymdyq jerlerdiń elektrondy geobotanıkalyq kartasy jasalady

ASTANA. QazAqparat - QR Aýyl sharýashylyǵy mınıstrligi jaıylymdyq jerlerdiń elektrondy geobotanıkalyq kartasyn jasap jatyr. Bul týraly «Nur Otan» partııasynyń Ortalyq apparatynyń keńesinde «Agrarlyq sala» baǵyty boıynsha ótken komıtet otyrysynda QR Aýyl sharýashylyǵy vıtse-mınıstri Erlan Nysanbaev málim etti, dep habarlaıdy «QazAqparat» HAA tilshisi.

«Jaıylym jerlerdiń shóp shyǵymdylyǵy men jaı-kúıin anyqtaý úshin mınıstrlik geobotanıkalyq zertteý jumystaryn júrgizýdi qolǵa aldy. 2017-2021 jyldarǵa arnalǵan agroónerkásip keshenin damytý baǵdarlamasyna sáıkes, quny 3,3 mıllıard teńgege 33 mıllıon gektarlyq jaıylym jerge geobotanıkalyq zertteý júrgiziledi. Al elektrondy kartalardy jasaýǵa 265 mıllıon teńge jumsalady. Bıylǵy jyly 325 mıllıon teńgege 3,8 mıllıon gektarlyq aýmaqqa zertteý jumystary júrgizildi. Jumystyń nátıjesi geobotanıkalyq kartalarda elektrondy formatta jarııalanatyn bolady», - deıdi Erlan Nysanbaev.

Vıtse-mınıstrdiń aıtýynsha, kartalarda jerdiń sapalyq minezdemesi, jaıylymdardyń shóp shyǵymy, jer ýchaskeleriniń kadastrlyq baǵasyn anyqtaýǵa múmkindik beretin alqaptardyń ónimdiligi kórsetiletin bolady.

«Atalǵan jumysty búgingi tańda «Azamattarǵa arnalǵan úkimet» Memlekettik korporatsııasy men onyń óńirlerdegi fılıaldary atqaryp jatyr», - deıdi Erlan Nysanbaev.