Qazaqstanda «Jaýyngerlik dostastyq - 2019» oqý-jattyǵýy bastaldy
Atalmysh sharaǵa Qazaqstan, Qyrǵyzstan jáne Reseı elderinen áýe shabýylyna qarsy qorǵanys áskerleriniń jaýyngerlik esepteri, sondaı-aq áskerı avıatsııa qatysady.
Qazaqstan Qarýly kúshteriniń atynan Áýe qorǵanysy kúshteriniń barlyq áskerı bólimderi, áýe shabýylyna qarsy qorǵanys áskerleri men tehnıka, Áskerı-áýe kúshteri jumyldyryldy. Tehnıkalyq bólim S-200V, S-300PS, S-75, S-125, «Tekshe», «Sheńber» zenıttik-zymyran keshenderin, Sý-30SM jańa joıǵyshtar, sonymen qatar MıG-31 jáne Sý-27, Sý-25, L-39 ushaqtaryn, Mı-35, Mı-171, Mı-17 tikushaqtaryn, qazaqstandyq óndiristen shyqqan ES-145 tikushaǵy men WinlongWL ushqyshsyz apparatyn usyndy.
Tájirıbelik is-qımyldar Qazaqstanda «Saryshaǵan» jáne Reseıde «Ashýlyq» áskerı polıgondarynda ótedi.
Qazaqstandyq bólimshelerden basqa «Saryshaǵan» polıgonynda «Jaýyngerlik dostastyq» oqý-jattyǵýyna Qyrǵyzstan Qarýly kúshteriniń S-75, S-125 zenıttik zymyran keshenderiniń jaýyngerlik esepteri de qatysady.
Qazaqstan, Qyrǵyzstan jáne Reseı memleketteriniń áýe shabýylyna qarsy qorǵanys áskerleriniń jaýyngerlik esepteýleri zenıttik zymyran keshenderiniń túrli úlgilerinen tájirıbelik atystardy oryndaıdy. Avıatsııa basqarylatyn jáne basqarylmaıtyn avıatsııalyq zymyrandar men bombalardy, avıatsııalyq zaqymdaý quraldaryn jaýyngerlik maqsatta qoldana otyryp, kúndizgi jáne túngi ýaqytta ushý qımyldaryn júrgizedi.
Buǵan deıin Qazaqstannyń Áýe qorǵanysy kúshteri jaýyngerlik ázirliktiń joǵary dárejesine keltirildi. Áskerı bólimder marsh, oqý - jattyǵý ótkizý aýdanyna kóshirýdi oryndasa, avıatsııa – jedel aerodromdarǵa ushýdy júrgizdi. Qazirgi ýaqytta áýe shabýylyna qarsy qorǵanys pen avıatsııa áskerleri toptarynyń birlesken jaýyngerlik is-qımyldaryn júrgizý tásilderi pysyqtalýda.