Qazaqstanda jataqhana oryndaryn bólýdiń jańa erejeleri bekitildi

ASTANA. QazAqparat – Ǵylym jáne joǵary bilim mınıstriniń 2022 jylǵy 30 jeltoqsandaǵy joǵary jáne joǵary oqý ornynan keıingi bilim berý uıymdarynda jataqhana oryndaryn bólý qaǵıdalary týraly buıryǵy jarııalandy, dep habarlaıdy QazAqparat tilshisi.

Stýdentterge jataqhanadan oryn berý jumystaryn oqý ornynyń konkýrstyq komıssııasy júzege asyrady. Bos oryndardyń bar nemese joqty týraly aqparat bilim ordasynyń resmı saıtynda aı saıyn jarııalanyp otyrady.

Jataqhanadan oryn alý týraly ótinishter oqý ornynyń ózinde nemese www.egov.kz veb-portaly arqyly qabyldanady. Qujat bilim ordasynyń keńse bólimine túsken sátte tirkeýge alynyp, bir jumys kúni ishinde konkýrstyq komıssııanyń qaraýyna jiberiledi. Keıin komıssııa ótinish negizinde jataqhanadaǵy oryndardy bóledi.

Stýdent oqý orny arqyly ótinish berse, onda ol talap etiletin qujattardy tolyq tapsyrǵanyn rastaıtyn qaǵaz kúıindegi anyqtama alýy tıis. Al bul qyzmetke elektrondyq portal arqyly tapsyrys bergen stýdenttiń «jeke kabınetinde» ótinishtiń mártebesi kórsetiledi. Qujattar tolyq emes nemese qoldaný merzimi ótip ketken jaǵdaıda oqý orny ol ótinishti qabyldamaıdy jáne bul týraly stýdentke aldyn ala eskertedi.

Konkýrstyq komıssııa jataqhana oryndaryn beliglengen tártippen myna sanattaǵy azamattarǵa basymdyq bere otyryp bóledi:

1. múgedekter, bala kezinen múgedektigi bar adamdar, múgedek balalar, jetim jáne ata-anasynyń qamqorlyǵynsyz qalǵan balalar, ata-anasynyń bireýi nemese ekeýi de múgedek adamdar;

2. kámeletke tolǵanǵa deıin ata-anasynyń qamqorlyǵynsyz qalǵan jastar sanatyndaǵylar, jeńildikteri boıynsha Ekinshi dúnıejúzilik soǵys ardagerlerine teńestirilgen azamattar, aýyldyń áleýmettik-ekonomıkalyq damýyn aıqyndaıtyn bilim berý baǵdarlamalary boıynsha oqýǵa túsken aýyl jastary, sondaı-aq qandastar;

3. «Máńgilik el jastary – ındýstrııaǵa!» («Serpin – 2050») jobasy aıasynda bilim alyp jatqan stýdentter;

4. birinshi kýrsta oqıtyn «Altyn belgi» ıegerleri, Prezıdenttik, halyqaralyq jáne respýblıkalyq olımpıadalar men konkýrstardyń jeńimpazy nemese júldegeri atanǵanyn rastaıtyn sertıfıkaty bar stýdentter, sondaı-aq oqýdy úzdik támamdaǵan rastaıtyn qujaty (kýálik, attestat, dıplom) bar talapkerler;

5. UBT nemese keshendi testileý, oqý pánderi boıynsha túsý emtıhandarynyń nemese bilim berý uıymy ótkizgen testileý nysanyndaǵy emtıhandardyń nátıjesine saı joǵary bal jınaǵan memlekettik bilim berý tapsyrysyna sáıkes birinshi kýrsqa qabyldanǵan stýdentter.

Oryn bólý kezinde stýdentterdiń UBT, keshendi testileý nemese ózge de túsý emtıhandarynyń qorytyndysyna sáıkes baldary teń bolsa, onda bilim alýshynyń materıaldyq jaǵdaıy eskeriledi.

Konkýrstyq komıssııa jataqhana oryndardyn kezeń-kezeńimen bóledi. Atap aıtqanda, oqý jylynyń sońynda, ıaǵnı maýsym aıynda birinshi kýrstan basqa kýrstardyń stýdentterinen ótinish qabyldaıdy. Al oqý jylynyń basynda (tamyz) birinshi kýrsqa túsken stýdentterge oryn bóledi. Sonymen qatar, jyl ishinde jataqhanada turatyn bilim alýshylar kontıngentiniń ózgerisine sáıkes qonystandyrý júrgiziledi.

Atalǵan sharalardy qamtıtyn tıisti buıryq alǵashqy resmı jarııalanǵan kúninen keıin kúntizbelik 10 kún ótken soń qoldanysqa engiziledi.