Elimizde jastarǵa energetıkalyq sýsyndardy satýǵa tyıym salynbaq
«Ult qaýipsizdiginiń negizgi strategııasynyń biri – ult densaýlyǵy. Óskeleń urpaqtyń densaýlyǵy – ult bolashaǵy. Búgin Senatta qaralǵan zańdy osyǵan deıin talqylaý barysynda depýtattar balalar men jasóspirimderge energetıkalyq sýsyndardy satýdy 21 jasqa deıin shekteýge jáne zańdy qatańdatýǵa qatysty usynystar boldy. Sebebi, energetıkalyq sýsyndar júrek-qan tamyrlary, qant dıabeti, búırek, júıke tamyrlary aýyrlaryna alyp keledi. Júkti áıelderge de keri áser etedi. Adamda qorqynysh, úreı paıda bolady. Psıhologııalyq jáne fızıkalyq táýeldilikke alyp keledi. Biz usynǵan túzetýler belgili bir dárejede bıznesti shekteıtin túsinemiz. Alaıda, balalarymyzdyń densaýlyǵy kez kelgen trln-daǵan qarjydan qymbat ekenin esterińizge salǵym keledi. Nege Úkimet Parlament depýtattarynyń bastamasyn qoldap, búginge deıin osy máseleniń qorytyndysyn bermedi? Osy másele boıynsha naqty usynymdardy bilgimiz keledi. Bul másele qandaı merzimde, qandaı zań jobasy aıasynda óziniń zańnamalyq sheshimin tabady?», - dep surady senator Ǵalısqar Sarybaev.
Óz kezeginde Densaýlyq saqtaý birinshi vıtse-mınıstri Tımýr Sultanǵazıev atalǵan másele boıynsha tıisti jumys bastalǵanyn aıtty.
«Qazir 21 jasqa deıin jasóspirimder men balalarǵa energetıkalyq sýsyndardy satýǵa tyıym salý boıynsha ARV (analız regýlıatornogo vozdeıstvııa - retteýshilik áserdi taldaý) daıyndalǵan. Ol Úkimetaralyq komıssııada maquldanǵan. Qazir Úkimet qorytyndysynyń jobasy daıyn. Barlyq ortalyq memlekettik organdarmen kelisilgen. Qazir ishki ister mınıstrligimen kelisý ǵana qaldy. Sonymen qatar, basqa normalar boıynsha vendıngtik apparattarda osy ónimdi satý nemese jarnamalarǵa tyıym salý boıynsha ARV (analız regýlıatornogo vozdeıstvııa) máselesi boıynsha jumys jalǵasyp jatyr. Bizdiń oıymyzsha, Májilistegi «Lýdonomanııa týraly» zańnamaǵa osy normalardy engizemiz», - dedi vıtse-mınıstr.
Eske salsaq, byltyr kúzde burynǵy Densaýlyq saqtaý mınıstri Ajar Ǵınııat elimizde 21 jasqa deıingi jastarǵa energetıkalyq sýsyndardy satýǵa tyıym salý máselesi pysyqtalyp jatqanyn aıtty.