Qazaqstanda jastar saıasatynyń basymdyqtary jańartyldy
Qazaqstan Respýblıkasynyń Din isteri jáne azamattyq qoǵam mınıstrligi taratqan aqparatqa sáıkes, jańa is-sharalar jastardy jumyspen qamtýǵa járdemdesýge, otbasy qundylyqtaryn nasıhattaýǵa, áskerı-patrıottyq tárbıeleýge, tıimdi bos ýaqytyn uıymdastyrýǵa, jastardyń bastamalaryn jáne jastar uıymdaryn ınstıtýtsıonaldyq qoldaýǵa, aýyl jastarynyń múmkindikterin damytýǵa, jastar kásipkerligine, volonterlik pen halyqaralyq jastar yntymaqtastyǵyna baǵyttalǵan.
«Josparda erte kásiptik baǵdarlaý baǵytyndaǵy jumysty júrgizý boıynsha «Túlekter taqtasy», «BÁITEREK-fest» jastar shyǵarmashylyq festıvali, «Týǵan jer» patrıottyq shyǵarmashylyq festıvali, «Jastardyń áleýmettenýi men damýy boıynsha jalpyulttyq joba», «Týǵan jerden-týǵan elge» Qazaqstan Respýblıkasynyń kıeli jerlerine joǵary synyp oqýshylaryna týrıstik joryq uıymdastyrý», «Jastardy áleýmettik qoldaý jáne jumyspen qamtamasyz etý máseleleri boıynsha qoǵamdyq monıtorıng», «Otbasy saǵaty» respýblıkalyq aktsııasyn ótkizý» jáne basqa da jańa jobalardyń iske asyrylýy kózdelgen. Sonymen qatar, «Rýhanı jańǵyrý» taqyrybyn JOO quramdasy sheńberinde gýmanıtarlyq baǵyttaǵy mamandyqtarǵa engizý josparlanǵan», - delingen taratylǵan aqparatta.
Vedomstvonyń atap ótýinshe, Memleket basshysynyń «Rýhanı jańǵyrý» baǵdarlamalyq maqalasynyń negizgi baǵyttaryn eskere otyryp, jospardy qabyldaý Memlekettik jastar saıasatynyń 2020 jylǵa deıingi tujyrymdamasyn iske asyrýdyń ekinshi kezeńindegi qoıylǵan maqsattar men mindetterge qol jetkizýge, memlekettik jastar saıasatyn iske asyrý salasyndaǵy vedomstvoaralyq ózara qatynasty kúsheıtýge, jastarmen jumysta jańa tásilderdi ázirleýge múmkindik beredi.
Jospar Qazaqstan Respýblıkasynyń Din isteri jáne azamattyq qoǵam mınıstrligimen múddeli memlekettik organdar, jastar uıymdary, jastar saıasaty salasyndaǵy sarapshylardyń usynystaryn eskere otyryp ázirlengen.