Qazaqstanda jastar saıasaty qalaı qarjylandyrylady

NUR-SULTAN. QazAqparat – «PaperLab» zertteý ortalyǵynyń dırektory Serik Beısembaev Qazaqstandaǵy jastar korpýsyn damytý jobasy – Zhas Project kezeńderi boıynsha zertteý qorytyndysyn baıandady, dep habarlaıdy QazAqparat.

Aıta keteıik, Qazaqstanda jastar korpýsyn damytý jobasyn Bilim jáne ǵylym mınıstrligi 2016 jyldan beri júzege asyrdy.

Jobanyń basty maqsaty – osal jastardy damytý jáne olarǵa qoldaý kórsetý edi.

Búgin elordada «Jastar korpýsyn damytý jobasyn júzege asyrý qorytyndylary» atty dóńgelek ústel ótip jatyr.

«2021 jyly biz QR Bilim jáne ǵylym mınıstrliginiń tapsyrysymen zertteý júrgizdik. Zertteýdiń maqsaty – Zhas Project jobasynyń 4 kezeńiniń nátıjesin qaraý edi. Zertteý aıasynda biz naqty taldaý júrgizdik, jastar saıasaty salasyndaǵy zańnamany, qarjy aǵyndaryn zerttedik. Onda 9 fokýs toby boldy. Sondaı-aq, biz benefıtsıarlarǵa saýalnama júrgizdik, mentorlardan, memlekettik qurylym ókilderinen, jalpy 700 adamnan suhbat aldy», - dedi zertteý ortalyǵynyń basshysy.

Serik Beısembaevtyń aıtýynsha, Táýelsizdik jyldary jastar saıasatynyń damyǵan ınfraqurylymy qalyptasty dep aıtýǵa bolady.

«Jastar saıasaty qalaı qarjylandyrylady? Munda ákimdikter, jergilikti atqarýshy organdar jáne granttyq qarjylandyrý júıesi arqyly iske asyrylatyn memlekettik áleýmettik tapsyrys syndy birneshe derekkózdi kórsetýge bolady. Búgingi tańda operator – memlekettik bastamalardy qoldaý ortalyǵy bolyp otyr. Salalyq memlekettik baǵdarlamalar aıasynda «Eńbek» baǵdarlamasy, Jastar praktıkasy, Bıznes Bastaý syndy jastar saıasaty qarjylandyrylady. Zertteý aıasynda 2016 jyldan 2021 jylǵa deıingi shyǵyndar taldandy. 5 jylda memlekettik bıýdjetten 13 mlrd teńgege jýyq qarajat bólindi. Bul rette qarajattyń jartysy jastar ortalyqtaryn ustaýǵa jumsalǵan. Bul - jastar saıasatyna jumsalatyn shyǵynnyń bir bóligi. Salalyq baǵdarlamalar, granttyq qarjylandyrý arqyly aıtarlyqtaı qarajat bólinedi», - dedi Serik Beısembaev.

Ortalyq basshysy memlekettik basqarý júıesine kóshý kezindegi jobany iske asyrýda qandaı syn-qaterler bolatynyn aıtty.

«Zhas Project jobasynda óte kóp steıkholderler bar. Sondaı-aq protsesterdiń bıýrokratııalanýyna jol bermeý kerek. Zhas Project jastardyń kontseptýaldy damý tásiline negizdeldi, ol qatań kórsetkishterge qol jetkizýdi kózdemeıdi. Munda senim máselesine nazar aýdarǵym keledi. Qarajatty irikteý, bólý júıesi jáne jergilikti jerlerde shynaıy mýltıplıkatsııalyq áser alýǵa múddeli áriptesterdiń, úılestirýshilerdiń, mentorlardyń tartylýy senim týdyrady», - dedi Serik Beısembaev.