Qazaqstanda Jastar korpýsyn damytý jobasy qandaı nátıje berdi
Onyń aıtýynsha, Jastar korpýsyn damytý jobasyn QR Bilim jáne ǵylym mınıstrligi men Dúnıejúzilik bank 2016 jyldan bastap júzege asyrdy jáne 2021 jyly aıaqtady. Búgin elordada «Jastar korpýsyn damytý jobasyn júzege asyrý qorytyndylary» atty dóńgelek ústel ótip jatyr.
«Joba úsh komponentten turdy. Olardyń ishindegi eń irisi – Zhas Project granttyq baǵdarlamasy boldy. Ekinshi komponent jastardy damytýǵa jaýapty mınıstrlikterdi – QR Bilim jáne ǵylym mınıstrligin, Aqparat jáne qoǵamdyq damý mınıstrligin ınstıtýtsıonaldyq damytýǵa baǵyttaldy. Mınıstrlikterdiń jastar saıasatyndaǵy ınstıtýtsıonaldylyǵyn sheshý jáne nyǵaıtý, jas qyzmetkerlerdiń áleýetin arttyrý úshin túrli maqsattar qoıyldy. Jobany iske asyrý barysynda granttyq baǵdarlamaǵa 10 myńǵa jýyq jas qatysyp, 3 myńǵa jýyq granttyq jobany júzege asyrdy. Ekinshi komponent aıasynda jastar saıasaty boıynsha strategııalyq qujattardy durys zertteýge, ázirleýge baǵyttalǵan 6 tapsyrma oryndaldy», - dedi G. Eskendirova elordada ótken dóńgelek ústelde.
Spıker atap ótkendeı, jastar 1 mln teńgege deıin grant alǵan. Olar top ishinde jumys istedi jáne toptyń árbir múshesi 6 aı boıy 40-60 myń teńge kóleminde stıpendııa alǵan. Granttyq qarjylandyrý ózderiniń áleýmettik ıdeıalaryn usynǵan jastarǵa bólingen. Áleýmettik jobalar túrli ıdeıalarǵa baǵyttalǵan. Jastar sport klýbtaryn, tigin tsehtaryn, aıaq kıim salondaryn, nan-toqash ónimderiniń shaǵyn óndiristerin ashqan.
«Biz olardyń aldyna ıdeıany bızneske aınaldyrý mindetin qoıǵan joqpyz. Bul úshin kóptegen basqa baǵdarlamalar bar. Bizdiń jobamyz bıznesti bastaý úshin daǵdylary joq jastarǵa baǵyttalǵan. ıAǵnı, olarǵa óz daǵdylaryn shyńdaýǵa múmkindik berdik, olar jobalyq basqarýdy úırendi, mentorlarmen jumys istedi. Ókinishke oraı, qazir jobany qarjylandyrý aıaqtaldy. Bul bastamany Aqparat jáne qoǵamdyq damý mınıstrligine beremiz. Mınıstrlik te jobany jalǵastyrýdy josparlap, qarastyryp jatqanyn estidik», - dedi Gúlmıra Eskendirova.