QAZAQSTANDA JASALǴAN: Tek qazaqstandyq ónimderdi satyp alamyn, meniń patrıottyǵym osynda jatyr dep oılaımyn - elorda turǵyny

ASTANA. QazAqparat - Úkimettiń keńeıtilgen otyrysynda Memleket basshysy jarııalaǵan "Qazaqstanda jasalǵan" aktsııasy shaǵyn jáne orta bıznes ókilderine qıyndyqtan shyǵýǵa kómektesedi. Mundaı pikirdi QazAqparat tilshisine bergen suhbatynda Astana turǵyny Shoqan Orazbekov aıtty.

«Memleket basshysy «Qazaqstanda jasalǵan» aktsııasyn der kezinde bastady. Meniń oıymsha, árbir Qazaqstan azamaty osy estafetany qabyl alýy qajet. Óz basym sońǵy birneshe jyl boıy tek otandyq ónimderdi alyp júrmin. Meniń túsinigimde óz elińe degen patrıottyq sezimniń negizi osynda bolýy tıis. Dostarymnyń kóbi dál men sııaqty otandyq ónimderdi tutynady jáne bul meni shyn qýantady», - deıdi Sh.Orazbekov.

Onyń aıtýynsha, mundaı qadamdardan elimizdiń shaǵyn jáne orta bıznesi ájeptáýir qoldaýǵa ıe bolady.

«Qıyn sátterde biz bir-birimizge qoldaý kórsetýge tıispiz. Eger jergilikti ónimderdi kóbirek alatyn bolsaq, óndirýshiler de qarap qalmaı, qyzmeti men óniminiń sapasyn arttyra túsedi dep oılaımyn», - deıdi ol.