Qazaqstanda jasalǵan Sibir jarasyna qarsy ekpe sapasyz bolyp shyqty
«Byltyr Qazaqstanda epızootııalyq ahýal óte kúrdeli boldy. Óıtkeni 4 óńirde Sibir jarasynyń aýrý oshaǵy tirkeldi. Qaraǵandy oblysynda 2 jaǵdaı, Batys Qazaqstan oblysynda, Shyǵys Qazaqstan oblysynda jáne Pavlodar oblystarynda oryn aldy. Sol oqıǵalarǵa baılanysty Aýyl sharýashylyǵy mınıstrligi Veterınarlyq baqylaý jáne qadaǵalaý komıteti tıisti sharalar atqardy. Jospar bekitilip, jergilikti atqarýshy organdarmen tyǵyz jumystar jasaldy. Sonymen birge jaýapkershilikti kóterdik, Úkimet tarapynan berilgen tapsyrmalar oryndaldy. Sibir jarasynan ólgen mal etin kómýdiń oshaqtaryn reestrge engizý tapsyryldy. Satyp alynyp jatqan ekpe dárilerdiń sapasyn tekserý maqsatynda birtalaı talaptar qoıyldy. Ol úshin ekpelerdi shetelge zertteýge jiberdik. Efıopııa, Ýkraına zerthanalarynyń shyǵarǵan qorytyndysy boıynsha, sapasy sáıkes emes degen qorytyndy keldi. Vaktsınany jetkizýshi kompanııaǵa qatysty sotqa júgindik, qazir materıaldar tergeýge joldandy», - dep atap ótti Aýyl sharýashylyǵy mınıstrligi Veterınarlyq baqylaý jáne qadaǵalaý komıteti Bıologııalyq qaýipsizdik basqarmasynyń basshysy Saltanat Ábilqasymova.
Ekpeniń sapasyn tıisti zerthanalarda zerttep shyqqan komıtet vaktsınanyń sapasyz ekenin anyqtady. Onyń óndirýshisi qazaqstandyq kompanııa ekeni de belgili boldy.
«Qoldanǵan vaktsına - qazaqstandyq ónim. Sonymen qatar belgili bir partııasy Reseıdiki bolǵan. Eki eldiki. Qazaqstandyq vaktsınanyń quramy sapasyz ekeni referenttik zerthananyń tekserýimen belgilendi. Tergeý jalǵasýda, onyń qorytyndysy aıtylady», - dedi Respýblıkalyq veterınarııalyq zerthana basshysy Pirimqul Ibragımov.
«Ekpe memlekettik bıýdjet esebinen jyl saıyn júrgiziledi. Ol jumystar jasalǵan, ekpeniń árbir partııasy mindetti baqylaýdan ótýi tıis. Olar Qazaqstanda tirkelgen bolýy tıis. Ol ekpelerdiń barlyǵy sapasyz boldy deýge bolmaıdy. Biraq sapasy sonshalyqty joǵary emes. Biraq barlyǵy da birdeı sapasyz emes. Ekpege kóp faktorlar áser etedi, saqtaý kezinde temperatýralyq rejım bolýy kerek. Ony durys qoldanýdy da bilý shart», - deıdi Pirimqul Ibragımov.