Qazaqstanda jasalǵan «Barys» bronetransporteri synaqtan ótip jatyr

ASTANA. QazAqparat - «Kazahstan Paramaýnt Injınırıng» shyǵarǵan otandyq ónim,  «Barys» bronetransporteriniń (BTR) kórsetilim synaqtary bastaldy, dep habarlaıdy «QazAqparat» HAA tilshisi.

QR Qorǵanys mınıstrliginiń sarapshylary qazir áskerı tehnıkany qys mezgilindegi ekstremaldy tabıǵı-klımattyq synaqtardan ótkizýde. Synaqtan ótkizý baǵdarlamasy túngi jáne kúndizgi ýaqyttardaǵy  tehnıkaǵa ornatylǵan qarýlardan atqylaý jumystaryn qarastyryp jatyr, dep habarlady vedomstvo baspasóz qyzmeti.

Bronetransporterdiń joǵary bóligine 30 mıllımetrlik turaqty 2A42 avtomatıkalyq  zeńbiregi jáne 7,62 mm PKT pýlemeti ornalastyrylǵan. Qarýdy túrik kompanııasymen birlesken otandyq zaýyt jasap shyǵarǵan.

Zamanaýı aspaptarmen jabdyqtalǵan jańa ásker tehnıkany «Kazahstan Paramaýnt Injınırıng» JShS ońtústikafrıkalyq  «Paramount Group» kompanııasymen birlesip daıyndaǵan.
 

Otandyq BTR kópfýnktsıonaldy, jyldam, sonymen birge ballıstıkalyq jáne mınadan qorǵanýdyń eń joǵary  talaptaryna jaýap bere alady.

 «Barys» 8h8 tuńǵysh ret IV Halyqaralyq «KADEX » qarýlaný jáne áskerı-tehnıkalyq múlik kórmesinde tanystyrylǵan.