QAZAQSTANDA JASALǴAN: «Astana-Ónim» zaýytynda sút ónimderiniń 23 túri shyǵarylady

ASTANA. QazAqparat - «Astana-Ónim» aktsıonerlik qoǵamy 1998 jyly qurylǵan. Ónerkásip asyl tuqymdy mal sharýashylyǵymen, ósimdik sharýashylyǵymen, jylqy sharýashylyǵymen, sondaı-aq qymyz, shubat sekildi sút ónimderin óndirýmen aınalysady. Búgingi tańda kásiporynda sút ónimderiniń 23 túri shyǵarylady, dep habarlaıdy elorda ákimdiginiń baspasóz qyzmetinen.

«Astana-Ónim» zaýytynyń jumysynyń basty baǵyty - memlekettik rezıdentsııalar men basqa da mekemelerge jetkiziletin joǵary sapaly aýyl sharýashylyq ónimderin shyǵarý.

Zaýyt kún saıyn 10 tonna sút ónimin óndiredi. Ónimniń basym bóligi rezıdentsııalar, túrli mekemeler, balabaqshalar, aýrýhanalar, saýda ortalyqtary men elorda dúkenderine tasymaldanady.

«Astana-Ónim» AQ bas dırektory Ǵalymjan Ábdihalyqovtyń aıtýynsha, ónerkásip elordadaǵy sýpermarketke orta eseppen kúnine 300 lıtr sút jetkizedi.

«Sizder búgin qazirgi zamanǵy aýyl sharýashylyq klasterin kórip otyrsyzdar. Ol 2014 jyly paıdalanýǵa berilgen bolatyn. Sút zaýyty buǵan deıin Mıchýrın aýylynda ornalasqan. Qazir Krasnoıarka eldi mekeninde, ótkizý bazasy da osy jerde», - deıdi ol.

Kásiporynda qoldanylatyn barlyq qondyrǵylar Germanııadan satyp alyndy. Qazirgi ýaqytta zaýytta 303 adam jumys isteıdi. Kompanııa jumysshylarynyń basym bóligi - jaqyn mańdaǵy aýyl turǵyndary.