«Qazaqstanda jasalǵan áskerı kólikterge suranys bar» - baspasózge sholý
***
«Egemen Qazaqstan» gazetiniń jazýynsha, keshe Memleket basshysy Nursultan Nazarbaev «Qazaqstan Paramaýnt Injınırıng» JShS birlesken kásipornynyń brondy dońǵalaqty mashınalar shyǵaratyn zaýytynda boldy.
Qazaqstan Prezıdenti - Qarýly Kúshterdiń Joǵarǵy Bas qolbasshysy zaýyttyń óndiristik orynjaılaryn aralap, shyǵarylatyn ónim túrlerimen tanysty. Sonymen qatar, kásiporynnyń eńbek ujymymen júzdesken Elbasy zaýyttyń jumysy eldiń qorǵanys qabiletin nyǵaıtý turǵysynan mańyzdy ekenin atap ótip, jumysshylarǵa tabys tiledi. Eńbek ujymynyń músheleri óz jetistikteri jóninde áńgimeledi jáne búgin jarııa etilgen Qazaqstan halqyna Joldaýdy qoldaıtyndaryn jetkizdi.
«Qazaqstan ınjınırıng Dıstrıbıýshn» JShS men «Paramaýnt grýpp» (OAR) kompanııasy birlesip qurǵan zaýyt oq ótkizbeıtin dońǵalaqty mashınalar óndiredi. Ortalyq Azııada alǵash ret júzege asyrylǵan bul joba qorǵanys jáne mashına jasaý ındýstrııasyna sapaly serpilis ákeletin kásiporyn qurýǵa múmkindik beredi. Zaýyttyń óndiris qýaty jylyna 120 oq ótkizbeıtin dońǵalaqty mashına shyǵara alady. Tehnıkalyq jabdyqtalý deńgeıi joǵary kásiporyn áskerı jáne azamattyq maqsatqa arnalǵan tehnıkalar óndirisi salasyndaǵy keń aýqymdy mindetterdi júzege asyrady dep boljanyp otyr. Zaýyt tehnologııasy birqatar jumystar aınalymyn, atap aıtqanda, metall paraqtaryn lazermen pishý, brondy paraqtardy balqytý, jabyndaryna lak-boıaýlar jaǵý, jınastyrý, sapasyn qatań baqylaýǵa alý sııaqty jumystardy tolyǵymen atqara alady.
Zaýyttaǵy qurastyrý bólimderi men qyzmet kórsetý ortalyqtary tapsyrys berýshilerdiń talaptaryna sáıkes mashınalardy ári qaraı jańa úlgilerin ázirleýge jáne jańǵyrtýǵa, tehnıkalyq qamtamasyz etýge yqpal etýde. Zaýyttan óndiriletin barlyq tehnıka halyqaralyq standarttar negizinde jasalatyndyqtan ónimdi Qazaqstannyń ózinde de, sonymen qatar, shetelde de aınalymǵa jiberýge bolady. Qazaqstandaǵy óndiriske usynylyp otyrǵan brondy dońǵalaqty mashına barlyq kórsetkishteri boıynsha úzdikterdiń biri bolady dep kútilýde. Osy jaıynda « Qazaqstanda jasalǵan áskerı kólikterge suranys bar» atty maqaladan tolyq oqı alasyzdar.
Bas basylymnyń búgingi sany Qazaqstan Respýblıkasynyń Tuńǵysh Prezıdenti kúnine arnalǵan. Osy oraıda gazette «Elbasynyń álemdik abyroıy» degen kólemdi maqala jarııalandy.
«Adamzattyń aldyndaǵy uly jaýapkershilikti Qazaqstan jáne onyń Prezıdenti Nursultan Nazarbaevtaı sezine bilý kerek degen oı-pikirimizdi Elbasynyń jahandyq saıasattaǵy ustanymy men kemel kóregendigi aıǵaqtaı túsedi jáne de Qazaqstannyń «senim, dástúr, ashyqtyq, tózimdilik» uranymen ótkizgen Eýropadaǵy qaýipsizdik jáne yntymaqtastyq uıymyndaǵy sátti de abyroıly tóraǵalyǵy elimizdiń, Tuńǵysh Prezıdentimizdiń álemdik qoǵamdastyqtyń kez kelgen uıymynyń tórinde otyryp, bılik aıta alar aqyly men parasatyn, kemeńgerligi men keńdigin, danalyǵy men daralyǵyn keshegi Birikken Ulttar Uıymy Bas Assambleıasynyń 70-shi sessııasynyń jalpy debaty taǵy da pash etkendeı edi.
Biz - adamzattyń búgingi tarıh kóshinde Máńgilik El bolýdy murat etip otyrǵan elmiz. Osy oraıda Elbasy Nursultan Nazarbaevtyń dúnıeniń búgingideı tolqymaly shaǵynda eldiń birligi men tynyshtyǵyn saqtaý jolyndaǵy aıtyp júrgen ulaǵatty da ósıetti sózderi men is-áreketteriniń asa mańyzdylyǵy men ómirsheńdigin uly ýaqyttyń ózi bizge baıaǵyda-aq uǵyndyrdy dep sanaımyz. Olaı bolsa, sol el birligi men yntymaǵyna qylaý túsirmeıik! Búgin bizge keregi de osy!»,-dep jazady Parlament Senatynyń depýtaty Jabal Erǵalıev.
***
«Ana tili» gazetiniń sońǵy sanynda «Ultymyzdyń umytylmas tulǵasy» atty maqala berilgen. «Ulttyq jýrnalıstıkamyzdyń birtýar tulǵalary az emes. Olardyń aldy sonaý ótken ǵasyrdyń basyndaǵy ardaqty Alash aqsaqaldary bolsa, bertinde, tipti keshegi keńestik tar zamannyń ózinde gazet-jýrnal basqaryp, ultyna, halqyna adal qyzmet etip, ózindik shyǵarmashylyq mektebin qalyptastyrǵan qalamger, qaıratker tulǵalarymyz edi. Sol aıtýlylarymyzdyń biri belgili pýblıtsıst-jazýshy, qoǵam jáne memleket qaıratkeri Sapar Baıjanov bolatyn»,-dep jazady basylym.
Jaqynda kezinde qaıratker-qalamger aǵaǵa bilim berip, jýrnalıstik mamandyqqa baýlyǵan ál-Farabı atyndaǵy Qazaq ulttyq ýnıversıteti rektoraty ǵımaratynyń Májilis zalynda belgili pýblıtsıst-jazýshy, qoǵam jáne memleket qaıratkeri Sapar Baıjanovtyń týǵanyna 85 jyl tolýyna baılanysty ýnıversıtettik «100 kitap» baǵdarlamasy aıasynda «Ultynyń umytylmas tulǵasy - Sapar Baıjanovtyń shyǵarmashylyǵy» atty respýblıkalyq ǵylymı-tájirıbelik konferentsııa uıymdastyryldy. Konferentsııany qysqasha sóz sóılep ashqan ýnıversıtet rektory, tehnıka ǵylymynyń doktory, akademık Ǵalymqaıyr Mutanov ardaqty azamat Sapar Baıjanovtyń ulttyq jýrnalıstıkamyzdyń kórnekti tulǵalarynyń biri ekendigin aıta kelip, ýnıversıtettiń óziniń aıtýly tulǵalaryna qashan da aıryqsha kóńil bólip kele jatqandyǵyn alǵa tartty. Sonyń bir aıqyn dálelindeı, konferentsııaǵa qatysýshylardyń nazaryna ýnıversıtettiń Marat Barmanqulov atyndaǵy teleradıokesheni túsirgen «Ultynyń umytylmas tulǵasy Sapar Baıjanovtyń shyǵarmashylyǵy» atty beıne fılm usynylyp, tanymdyq-taǵylymdyq mánimen erekshelendi. Belgili qalamger, qoǵam qaıratkeri Sultan Orazalın júrgizgen derekti fılmde Qazaqstan Respýblıkasy Parlamenti Senatynyń Tóraǵasy Qasym-Jomart Toqaev pen Senat depýtaty Qýanysh Sultanov, «Egemen Qazaqstan» gazeti» AQ-nyń prezıdenti Saýytbek Abdrahmanovtyń qaıratker-qalamger Sapar Baıjanovtyń ómiri men ónegesi haqyndaǵy sózderi de este qalarlyqtaı boldy
***
Qazaqstan Respýblıkasynyń Tuńǵysh Prezıdenti kúni qarsańynda Shyǵys Qazaqstan oblysy metallýrgteri aýqymdy fleshmob ótkizdi, dep jazady «Ekspress K» gazeti «Kosmıcheskıı fleshmob» atty materıalda. Zyrıanovsk, Serebrıansk, Rıdder jáne Óskemende «Qaztsınk» kompanııasynyń jumysshylary osy sharaǵa qatysyp, Prezıdenttiń Kóshbasshylyǵyna qurmet kórsetti. Fleshmobke qatysqan árbir adam qalta shamdaryn jaǵyp, onyń jaryǵyn aspanǵa qaraı baǵyttady. Myńdaǵan qalta shamdar bir mezgilde oblystyń tórt qalasynda jaǵyldy. Sharaǵa qatysýshylardyń paıymynsha, osy sátte Jerdegi «1» sany ǵaryshtan da kórinýi múmkin.