Qazaqstanda Jas dıplomattar keńesi qurylady

ASTANA. QazAqparat - Qazaqstanda Jas dıplomattar keńesi qurylady. Bul týraly búgin «Qazaqstan dıplomatııasynyń jańa esimderi» atty kitaptyń tanystyrylymynda QR Syrtqy ister mınıstriniń orynbasary Roman Vasılenko aıtty, dep habarlaıdy QazAqparat tilshisi.

«Aǵymdaǵy jyly alǵash ret taǵaıyndalǵan qyzmetkerlerdi kásibı beıimdeý jáne olardyń kásibı ósýine qoldaý kórsetý maqsatynda Jas dıplomattar keńesin qurýdy josparlap otyrmyz. Keńes jumysyna osydan 2-3 jyl buryn qurylǵan qazaqstandyq dıplomattar birlestigi basshylyq jasaıtyn bolady», - dedi QR SІM orynbasary.

Sonymen qatar ol elimizdiń jas dıplomattary sporttyq sharalarǵa da belsene qatysyp, salaýatty ómir saltyn ustanatyndyǵyn atap ótti.

«Bul da jastardy jan-jaqty damytýdyń mańyzdy kórsetkishi sanalady. Bizdiń qatarymyzda bes adamnan turatyn marafonshylardyń áýesqoı komandasy, fýtbolshylar, tennısshiler, bir eskekshi, tipti Ironman da bar. Osydan biraz kún buryn ǵana bizdiń Izraıldegi eki qyzmetkerimiz Tel-Avıvte tolyq marafondy júgirip ótti. Sondaı-aq dıplomattarymyz «Ne? Qaıda? Qashan?» bilgirler oıynyna da belsendi qatysady», - dedi ol.

Roman Vasılenko elimizdiń Syrtqy ister mınıstrligi oqýshylar, stýdentter jáne eriktiler úshin ashyq ekendigin basa aıtty.

«Osy jyldyń kúzinde «BUU modeli» atty kezekti jalpyulttyq sharasyn ótkizý josparlanyp otyr. Onyń aıasynda búkil elimizdiń stýdentteri ózekti halyqaralyq problemalar boıynsha pikirtalas ótkizedi», - dedi SІM orynbasary.

Aıta keteıik, búginde Syrtqy ister mınıstrliginiń 289 jas dıplomat jumys isteıdi.