Qazaqstanda jańartylatyn energııa kózderi boıynsha jobalar júzege aspaq
Atap aıtqanda, Qazaqstannyń Energetıka mınıstrligi men Eýropanyń Qaıta qurý jáne damý banki arasynda jańartylatyn energııa kózderin qoldanýdy damytý máseleleri boıynsha yntymaqtastyq men qoldaý kórsetý týraly memorandýmǵa qol jetkizildi. Eýropalyq bank Qazaqstanda jańartylatyn energııa kózderin qoldaný jobalaryna 200 mln AQSh dollaryn bólýdi josparlaýda jáne qosymsha 480 mln dollar ınvestıtsııany ózge xalyqaralyq qarjy uıymdarynan tartpaq. Nátıjesinde Qazaqstanda 500 MVt jańartylatyn energııa kózderiniń jobalaryn qarjylandyrý kózdeýde.
"Búgin jańartylatyn energııa kózderimen baılanysty mańyzdy kelisimderge qol qoıyldy. Úkimet pen Energetıka mınıstrligi jyl boıy osy baǵytta qyzý jumys istedi. Eýropalyq bank atalmysh kelisimniń negizinde jahandyq klımattyq qordyń esebinen Qazaqstanda kún jáne jel stansalaryn salýǵa 200 mln dollar qarajat quıady. Sonymen qatar 480 mln dollardy ózge de qarjy ınstıtýttarynan tartýǵa bolady. Sonyń nátıjesinde 680 mln dollar bólinip, 2-3 jylda, 2020 jylǵa deıin Qazaqstanda 500 megavatt kún jáne jel qýattardy engizýge bolady", - dedi QR Energetıka mınıstri Qanat Bozymbaev tilshilerge bergen suxbatynda.
Sonymen qatar Energetıka mınıstrligi ENI jáne General Electric syndy álemdik kompanııalarmen yqpaldastyqty tereńdetetin kelisimge qol jetkizdi.
"Astana EHRO-2017" jel elektrstansasyn salý jobasyn qarjylandyrý úshin "TsATEK Green Energy", Qazaqstan damý banki men "BRK-Lızıng" AQ arasynda kelisim jasaldy.
United Greenı men "Baıqońyr Solar" kompanııalary Eýropanyń Qaıta qurý jáne damý bankimen Qyzylorda oblysynda qýaty 50 MVt bolatyn kún elektrstansasyn salý jóninde kelisimge keldi.
"Biz búgin biz jalpy qýaty 700 MVt bolatyn jańartylatyn energııa kózderiniń jobalary boıynsha memorandýmdarǵa qol qoıdyq. Qazaqstanda sońǵy jyldary 300 MVt qýaty bar jobalar paıdalanýǵa berildi. Sońǵy bir jylda - 150 MVt. Biz 2020 jyly Qazaqstanda óndiriletin energııanyń 3%-i jańartylatyn energııa kózderinen alynýyna qol jetkizip, bul kelisimderdi júzege asyrýymyz kerek. Ol mejeni Memleket basshysy bizge "jasyl" ekonomıkany damytý tujyrymdamasynda qoıǵan bolatyn", - dedi Q.Bozymbaev.