Qazaqstanda janarmaı tapshylyǵy oryn alady deýge esh negiz joq - U. Qarabalın

ASTANA. QazAqparat - Qazaqstanda janarmaı tapshylyǵy oryn alady deýge esh negiz joq. Búgin Ortalyq kommýnıkatsııalar qyzmetinde ótken brıfıng barysynda jýrnalıster saýalyna jaýap bergen Energetıka birinshi vıtse-mınıstri Uzaqbaı Qarabalın osylaı málimdedi.

«Janar-jaǵarmaı boıynsha Reseıgi birshama táýeldi bolǵandyqtan, bunyń baǵasy Qazaqstanda sol kórshiles eldegi baǵaǵa baılaýly. Sondyqtan da, biz Reseıde, álemdik deńgeıde baǵanyń qalaı qubylatynyn baqylaýdamyz. Elimizdi tapshylyqqa ushyratpaýǵa tyrysamyz. Qazirgi kúni elimizdegi bazalarda benzınniń qory 230 myń tonnaǵa jýyq, al dızel otyny 140 myń tonnanyń aınalysynda. ıAǵnı, zaýyttar óz mólsherindegi ónimdi shyǵaryp otyr, endeshe Qazaqstanda janarmaı tapshylyǵy oryn alady deýge esh negiz joq», - dedi Uzaqbaı Qarabalın.

Onyń aıtýynsha, byltyrǵy jyly oryn alǵan tapshylyq negizinen Reseıdegi zaýyttardyń isten shyǵýyna qatysty bolatyn.

«Bul bizde ǵana emes, Reseıdiń ózine de qıynshylyq týdyrǵany belgili. Sodan beri, Qudaıǵa shúkir, ondaı oqys jaǵdaı bolǵan emes. Reseıdiń zaýyttarynyń tileýin tilep otyrýǵa týra keledi», - dedi U. Qarabalın.

Aıta keterligi, 2017 jyldan keıin Qazaqstanda úsh munaı óńdeý zaýytyn jańǵyrtý esebinen ishki naryqtyń suranysy tolyq qamtamasyz etiledi dep josparlanǵan.