Qazaqstanda Jańa jyldyq dastarhan jaıý úshin qansha teńge kerek

<p>ASTANA. KAZINFORM &ndash; Olıve, manty, mandarın jáne aqqaınar. Jańa jylǵa arnalǵan dastarhan ústinde osy taǵamdar turady. Elimizde merekelik dastarhan jaıýǵa qansha teńge jumsalady? Bul týraly Kazinform agenttiginiń tilshisi saralap kórdi.</p>

Jańa jylǵa deıin birer kún qaldy. Qazaqstandyqtar qazir merekelik dastarhanǵa qoıatyn as mázirin ázirlep, oǵan qajetti taǵamdardy satyp alyp jatyr. Biz otbasyndaǵy tórt janǵa dastarhan jaıý quny qansha turatynyn saralap kórdik. Árıne, ár otbasynyń as máziri ártúrli. Súıikti taǵamdary da talǵamǵa qaraı ózgeshe daıyndalady. Soǵan qaramastan biz qarapaıym ǵana dastarhan mázirin aldyq. Oǵan eki salat, manty, jemis-jıdek pen tort jáne shyryndy qosyp, shyǵynyn eseptedik.

Jańa jyl túninde dastarhanda olıve nemese balyq qosylǵan salat bolady. Al Jańa jyl merekesine arnalǵan dastarhannyń sáni – mandarın. Sonymen birge qazaqstandyqtar ananasty da sol túngi dastarhanǵa qoıady. Aqqaınar da dastarhannan tabylady. Dastarhan basyna jınalǵandar bir-birine tilek aıtyp, sharap ishse, balalarǵa shyryn nemese gazdalǵan túrli tátti sýsyn beredi. Endi tórt adamǵa arnalǵan dastarhan mázirin eseptep kóreıik. 

Basty ystyq tamaq – manty. Ár otbasy ony ártúrli daıyndaıdy. Et ishine pııaz, kartop nemese asqabaq qosady. Tartylǵan sıyr etiniń kelisi shamamen 3000 teńge turady. Un 600, pııaz 200, kartop 150 teńge. Al asqabaqtyń kelisi 700-800 teńge. Qajetti qarjy - 4750 teńge. 

Infografıka: Kazinform

Salat ázirleýge ne qajet? Eki ydysqa «olıve» daıyndaý úshin 200 gr pisken kartop (60 tg), 4 jumyrtqa (240tg), 200 gr shujyq nemese pisken et (400tg), 200 gr tuzdalǵan qııar (150 tg), 200 gr pisken sábiz (50 tg), 100 gr pııaz (40tg), 400 gr maıonez (450 tg), 1 banka burshaq (550tg), tuz jáne burysh (50 tg). Shyǵyny – 1990 teńge.

«Balyq qosylǵan salat»: 400 gr tuzdalǵan balyq (900 tg), 300 gr pisken kartop (60 tg), 300 gr pisken sábiz (80 tg), 100 gr pııaz (40 tg), 6 dana jumyrtqa (450 tg), 300 gr pisken qyzylsha (200 tg), 400 gr maıonez (450 tg). Shyǵyny – 2180 tg.

Shaı dastarhanyna tort alady. Deserttiń bul túri shamamen 7000 teńge turady. Al jemisten mandarın (1400 tg), alma (500 tg), ananas (2000 tg) alady. Sýsynan aqqaınar (2000-7000 tg), salqyndatylǵan shyryndy (500-1000 tg) dastarhanǵa qoıady.

Nátıjesinde Jańa jylǵa arnap dastarhan jaıý quny 24 000 teńgeden asady. Dastarhanǵa qajetti taǵam men salatqa qosatyn kókónis pen ózge qospalardyń ortasha baǵasy alyndy. Aımaqtar arasynda Taraz ben Túrkistanda dastarhan mázirine az aqsha jumsaýǵa bolady. Al qymbaty – Astana, Almaty jáne Atyraýda.