Qazaqstanda jańa ulttyq jobalardyń tizbesi aıqyndalady

ASTANA. QazAqparat - QR Premer-Mınıstriniń orynbasary – Qarjy mınıstri Erulan Jamaýbaev jańa ulttyq jobalardyń tizbesin aıqyndaý jóninde keńes ótkizdi, dep habarlaıdy QazAqparat vedomstvoǵa silteme jasap.

Jıynda sonymen qatar «Samuryq-Qazyna» ulttyq ál-aýqat qory» aktsıonerlik qoǵamynyń qyzmetin qaıta formattaý, memlekettik aktıvterdi basqarý jónindegi jyl saıynǵy Ulttyq baıandamany daıyndaý, memlekettik jáne kvazımemlekettik sektordyń iri ınvestıtsııalyq jobalaryn iske asyrýǵa arnalǵan ashyq halyqaralyq konkýrstardy engizý máseleleri qaraldy.

Oǵan ortalyq memlekettik organdar, «Samuryq-Qazyna» ulttyq ál-aýqat qory» aktsıonerlik qoǵamy, «Báıterek» ulttyq basqarýshy holdıngi» aktsıonerlik qoǵamy, «Kazakh Invest» ulttyq kompanııasy» aktsıonerlik qoǵamy ókilderi qatysty.

Máselen, ulttyq jobalardy ázirleý kezinde olardyń ólshemsharttary, memlekettik aktıvterdi jáne kvazımemlekettik sektordy basqarý boıynsha jyl saıynǵy Ulttyq baıandamany qalyptastyrýdy daıyndaý, júrgizilgen taldaý nátıjeleri, onyń ishinde iri ınvestıtsııalyq jobalardy iske asyrýǵa ashyq halyqaralyq konkýrstar ótkizýdiń zerdelengen halyqaralyq tájirıbesi, sondaı-aq «Samuryq-Qazyna» ulttyq ál-aýqat qory» aktsıonerlik qoǵamynyń qyzmetin qaıta formattaý tásilderi talqylandy.

Sóz sońynda Erulan Jamaýbaev memlekettik organdar men uıymdarǵa birqatar tıisti tapsyrmalar berdi.

Foto : gov.kz