Qazaqstanda jańa qoǵamdyq ınstıtýt - Tatýlasý ortalyqtary ashylady

ASTANA. QazAqparat - Búgin elordada Joǵarǵy Sottyń «Tatýlasý: sotqa deıin, sotta» degen jobasynyń aıasynda QR Joǵarǵy Sotynyń tóraǵasy J. Asanov pen QR Kásipodaqtar federatsııasynyń tóraǵasy B. Ábdiraıym «Ózara yntymaqtastyq týraly» memorandýmǵa qol qoıdy, dep habarlaıdy QazAqparat.

Joǵarǵy Sot tóraǵasy Jaqyp Asanovtyń basshylyǵymen búginderi jeti iri joba ázirlenýde. Sonyń biri - Tatýlasý ortalyqtary. Bul jańa jobanyń basty maqsaty - taraptardy bitimge keltirý. Óz sózinde J. Asanov onyń eki joly baryn atap ótti. Birinshisi, daýlardy sotqa jetkizbeı sheshý, ekinshisi, sotta sheshý. Sondyqtan búgingi memorandým daýlardy sotqa deıin, sotqa jetkizbeı sheshýge arnalǵan.

Іri joba boıynsha alǵashqy iskerlik qadam jasaldy. «Bir oıshyl aıtqandaı, «myń shaqyrymdyq jol birinshi qadamnan bastalady». Búgingi memorandaým sondaı birinshi qadam, úlken jáne nátıjeli, ıigilikti istiń basy», dedi Jaqyp Qajymanuly.

Al Baqytjan Jarylqasynuly óz sózin «Bul bastama - úlken fılosofııaǵa aınalady. Bul - úlken uǵym. Daýsyz alań - daýsyz aımaqqa aınalaıyn dep otyr. Bitimgershilik - ata-babamyzdan kele jatqan dástúr. Sondyqtan 2 mln-ǵa jýyq múshesi bar Kásipodaqtar federatsııasy atynan bul bastamaǵa qoldaý bildiremin. Tatýlastyrý ortalyqtaryn jańa qoǵamdyq ınstıtýtqa aınaldyramyz dep senemin», - dep túıindedi.

J. Asanovtyń aıtýynsha, jańa joba Elbasynyń Úkimettiń keńeıtilgen otyrysynda bergen tapsyrmasyna saı qolǵa alynǵan. Óńirlerde alǵash bolyp osy bastamany iske asyrýǵa Qyzylorda oblystyq ákimdigi qoldaý kórsetti. Aldaǵy ýaqytta Tatýlasý ortalyqtaryn elimizdiń oblys ortalyqtarynda, Semeı men Jezqazǵanda ashý josparlanǵan. Mundaı ortalyqtar halyqqa qyzmet etip, qoǵamdaǵy daýlardy sheshýge kómektesetin bolady.

Nurlan QALQA

Foto: zavarnik.biz