Qazaqstanda jańa eksporttyq-kredıttik agenttik qurylady
Búgin Májilis depýtattary «QR keıbir zańnamalyq aktilerine eksporttyq-kredıttik agenttik jáne shıkizattyq emes taýarlar (jumystar, kórsetiletin qyzmetter) eksportyn ilgeriletý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Prezıdent Qazaqstan halqyna Joldaýynda eksportty igeriletý úshin KazakhExport bazasynda barlyq qajetti quraldar shoǵyrlanǵan tolyqqandy eksportty damytý ınstıtýtyn qurýdy tapsyrǵan edi.
Búgingi zań jobasy saqtandyrýǵa jáne qaıta saqtandyrýǵa arnalǵan lıtsenzııasyz áreket etetin, shıkizattyq emes eksportty qarjylyq qoldaý jáne damytýdyń negizgi sharalaryn biriktirýge múmkindik beretin eksporttyq-kredıttik agenttiktiń arnaıy quqyqtyq mártebesin qurýǵa baǵyttalǵan. Zań jobalaý qyzmeti jónindegi vedomstvoaralyq komıssııa joba tujyrymdamasyn maquldady. Reseı, Majarstan, Aýstralııa jáne Úndistandaǵy eksporttyq-kredıttik agenttik tájirıbesine taldaý júrgizildi, ol EKA eksporttyq operatsııalardy saqtandyrýdy, qaıta saqtandyrýdy, kepildendirýdi jáne qarjylandyrýdy júzege asyratynyn kórsetti
, - dedi Qaırat Tórebaev.
Onyń aıtýynsha, EKA qurý barysynda analogti úlgide saqtandyrý, qaıta saqtandyrý, kepildik berý, ýaǵdalasqan salymdar, sýbsıdııalaý, ıaǵnı ózge kompanııalardyń fýnktsııalarymen qaıtalanbaıtyn fýnktsııalardy qarastyrý usynylady.
Sonymen birge, mınıstrlik ókili eksporttyq-kredıttik agenttik jumysynan qandaı nátıje kútiletinin aıtty.
Birinshiden, 2025 jylǵa oraı 41 mlrd AQSh dollaryna deıin shıkizattyq emes taýarlar eksporty kóleminiń ósýi týraly «Qazaqstandyqtardyń ál-aýqatyn arttyrýǵa baǵyttalǵan ornyqty ekonomıkalyq ósý» ulttyq jobasy ındıkatoryna qol jetkiziledi.
Ekinshiden, eksporttaýshylardy qoldaýda mańyzdy fýnktsııalardy ıelenetin ekonomıkalyq yntymaqtastyq jáne damý uıymynyń damyǵan elderi tájirıbesi boıynsha Qazaqstanda alǵash ret zamanaýı eksporttyq-kredıttik agenttik qurylady. Úshinshiden, operatsııalyq qyzmetke aralaspastan, Úkimetke jáne múddeli memlekettik organdarǵa EKA esep berý jáne baqylaýynda bolý mehanızmderi qurylady.
Atap aıtqanda, zań jobasy arqyly «Saýda qyzmetin retteý týraly» zańda EKA quqyqtyq mártebesin kózdeý usynylady, ıaǵnı shıkizattyq emes eksportty damytý men ilgeriletýde ulttyq ınstıtýt mártebesin ıelenetin, QR Úkimetiniń sheshimi boıynsha aıqyndalatyn zańdy tulǵa uǵymy túsindiriledi
, - dedi Qaırat Tórebaev.
Sonymen birge, depýtattar «Jańa eksporttyq-kredıttik agenttik qurylǵan soń, eldegi basqa eksporttyq kompanııalar naryqtan shyǵyp ketpeı me?» degen suraq qoıdy.
Negizi Qazaqstanda ártúrli 29 saqtandyrý kompanııasy bar. Degenmen, eksporttaýǵa jáne eksporttyq kompanııalarǵa «Qazaqeksporttan» basqa eshkim qyzmet kórsetpeıdi. 20 jyl boıy basqa kompanııalarǵa naryq ashyq bolǵanymen, munymen eshkim aınalyspady. Sondyqtan, bul táýekeli joǵary, paıdasy az sala bolyp sanalady. Basqa kompanııalarǵa esh shekteý engizbeımiz, naryqtyq júıege ashyqpyz
, - dep jaýap berdi Q. Tórebaev.
Qosymsha baıandamashy, Májilis depýtaty Rýslan Qojasbaevtyń aıtýynsha, bul zańdy qabyldaý eksporttyq-kredıttik agenttiktiń arnaıy quqyqtyq mártebege ıe bolýyna múmkindik beredi. Qazaqstandyq eksporttaýshylardy memlekettik qoldaýdyń tıimdiligin arttyrady, eksportqa baǵdarlanǵan óndiristerdi ulǵaıtý esebinen jańa jumys oryndaryn qurady, eksportqa baǵdarlanǵan óndirister aýdaratyn salyqtardy kóbeıtý esebinen bıýdjet qarajatyn ósiredi jáne eksporttyq sebetti úlkeıtedi.
Zań jobasy 10 zańnamalyq aktige, sonyń ishinde kodekske jáne 8 zańǵa ózgerister men tolyqtyrýlar engizýdi kózdeıdi.
Jumys toby zań jobasyn ekinshi oqylymǵa daıyndaý úshin jumysyn jalǵastyrady.