Qazaqstanda jábirlenýshilerge arnaıy ótemaqy tólenýi múmkin

ASTANA. QazAqparat - Qazaqstandaǵy qylmystyq is júrgizý protsesinde jábirlenýshilerge ótemaqy tóleýde qamtamasyz etýge arnalǵan arnaıy qor qurý kózdeledi. Bul týraly búgin QR Parlamenti Májilisiniń jalpy otyrysynda Qylmystyq is júrgizý kodeksiniń jobasyn talqylaý barysynda málim boldy.

QR Bas prokýrorynyń birinshi orynbasary Iogan Merkeldiń aıtýynsha, álemdik tájirıbede mundaı qorlar bar jáne olardy qarjy mınıstrlikteri basqarady. «Biz búgingi tańda jańa qylmystyq, qylmystyq is júrgizý jáne ákimshilik ister boıynsha aıǵaqtardy engizýge baǵyttalǵan jalpyulttyq josparyn aıaqtaý satysyndamyz. Osy jospar boıynsha jábirlenýshilerge ótemaqy tóleýde qamtamasyz etý qoryn qurý qarastyrylyp otyr. Árıne, arnaıy zań bolmasa bul qor da jumys isteı almaıtyny aıqyn. Ondaı qordy Qylmystyq is júrgizý kodeksine engize de almaımyz. Sondyqtan da Qarjy mınıstrligi quqyq qorǵaý organdarymen birlese otyryp arnaıy zań jobasyn ázirleýge kirisedi», - dedi I. Merkel. Onyń aıtýynsha, mundaı qor arqyly aldaǵy ýaqytta qylmystyq áreketterden japa shegip, jábirlengen azamattar arnaıy ótemaqy tólemderimen qamtamasyz etiletin bolady.