Qazaqstanda zeınetaqy men járdemaqy ósti
Atap aıtqanda, bul ózgeris zeınetaqy men járdemaqy alatyn 4,4 mln adamǵa áser etedi.
Osy maqsattarǵa respýblıkalyq bıýdjette 4,6 trln teńge qarastyrylǵan.
«Bazalyq zeınetaqynyń mólsheri eń tómengi kúnkóris deńgeıiniń jyl saıynǵy ulǵaıýyn eskere otyryp, sondaı-aq Memleket basshysynyń tapsyrmasyna sáıkes, onyń eń tómengi mólsheri eń tómengi kúnkóris deńgeıiniń 54% - dan 60% - ǵa deıin ulǵaıýyna baılanysty artty. Yntymaqty zeınetaqy mólsheri ınflıatsııa deńgeıinen 2% - ǵa artyp kóterildi. Budan basqa, Memleket basshysynyń tapsyrmasyna sáıkes, yntymaqty zeınetaqyny esepteý úshin paıdalanylatyn eń joǵary tabys mólsheri 46-dan 55 AEK-ke deıin (158,7-den 189,8 myń teńgege deıin) ulǵaıtyldy», - delingen Eńbek jáne halyqty áleýmettik qorǵaý mınıstrligi málimetinde.
Osy oraıda bıýdjetten tólenetin zeınetaqy tólemderiniń eń tómengi mólsheri 68,2 myń teńgeden 77,4 myń teńgege deıin ósti. Zeınetaqynyń ósýi barlyq 2,2 mıllıon zeınetkerge áser etti.
«Eń tómengi kúnkóris deńgeıiniń ulǵaıýyna baılanysty múgedektik jáne asyraýshysynan aıyrylǵan jaǵdaıda tólenetin járdemaqylardyń mólsheri de artty. Aılyq eseptik kórsetkish (AEK) mólsheriniń ulǵaıýyna baılanysty taǵy da birqatar járdemaqynyń mólsheri ósti. Máselen, jumys isteıtin de, jumys istemeıtin de áıelderge bala týýǵa baılanysty tólenetin memlekettik qoldaýdyń mólsheri endi: birinshi, ekinshi jáne úshinshi balaǵa 38 AEK nemese 131 100 teńge (2022 jyly – 120 840 teńge), tórtinshi jáne odan da kóp balaǵa – 63 AEK nemese 217 350 teńgeni (2022 jyly - 200 340 teńge) quraıdy», - dep atalyp ótken mınıstrlik habarlamasynda.
Respýblıkalyq bıýdjetten jumys istemeıtin ata-analarǵa bala kútimi boıynsha járdemaqy beriledi, onyń mólsheri AEK ósýin eskere otyryp, bıyldan bastap 8,5% - ǵa ósti.
Jumys isteıtin ata-analar bala kútimi boıynsha áleýmettik tólemderdi Memlekettik áleýmettik saqtandyrý qorynan alady. 2023 jyldan bastap Prezıdent tapsyrmasy boıynsha bala kútimi boıynsha tólem merzimi bir jyldan bir jarym jylǵa deıin uzardy.
Múgedektigi bar balalardy qoldaý úshin Qazaqstanda kámeletke tolǵanǵa deıin arnaýly memlekettik járdemaqy tólenedi. Onyń mólsheri 2023 jyly 56 794 teńgeni (buryn 52 345 teńge) quraıdy.
Jańa jyldan bastap kópbalaly otbasylarǵa arnalǵan járdemaqy mólsheri AEK ulǵaıýyn eskere otyryp ósti: 4 balasy bar otbasylarǵa aı saıyn 55 304 teńge (buryn 50 976 teńge), 5 balaǵa – 69 138 teńge (buryn 63 728 teńge), 6 balaǵa – 82 973 teńge (buryn 76 479 teńge), 7 balaǵa – 96 807 teńge (buryn 89 231 teńge), 8 jáne odan kóp bala bolsa ár balaǵa – 13 800 teńgeden (buryn 12 720 teńge) beriledi.