Qazaqstanda zańsyz qyzmet etken «1WIN» halyqaralyq onlaın-kazınosynyń qyzmeti toqtatyldy

ASTANA. QazAqparat - Qarjy monıtorıngi agenttigi Almaty oblysy departamenti elimizde zańsyz onlaın-kazıno uıymdastyrǵan «1WIN» uıymyna qatysty sotqa deıingi tergep-tekserýdi bastady, dep habarlaıdy QazAqparat.

Atalǵan uıym Qazaqstan aýmaǵynda ǵana emes, sondaı-aq TMD jáne alys shetelde qyzmet atqarǵan.

Myńdaǵan jerlesterimizdi zańsyz oıyn bıznesine tartyp qana qoımaı, onlaın platforma býkmekerlik qyzmetti tıisti lızentsııasyz atqarǵan.
Aqsha qarajaty ǵalamtor-ekvaırıng arqyly jáne aýtentıfıkatsııalaýsyz qabyldanýy, qumar oıyndarǵa kámeletke tolmaǵandardyń qatysýyna da múmkindik berdi.
Qazaqstan zańnamasyna sáıkes elde onlaın-kazınonyń qyzmetine tyıym salynǵan, al býkmekerlik qyzmetter tıisti lıtsenzııa bolǵan jaǵdaıda usynylady.
Qazirgi tańda zańsyz oıyn bıznesin uıymdastyrýshy kúdikti retinde tanylyp, qajetti tergeý jáne jedel izdestirý áreketteri jalǵasýda.
QR QPK 201 babyna sáıkes ózge aqparat jarııalaýǵa jatpaıdy.
QR Konstıtýtsııasynyń 77-babynyń 3-tarmaǵynyń 1-tarmaqshasyna jáne QR Qylmystyq-protsestik kodeksiniń 19-babynyń 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árkim kinásiz dep esepteledi.