Qazaqstanda zańnamaǵa kólik máseleleri boıynsha ózgerister engiziledi
QR Indýstrııa jáne ınfraqurylymdyq damý vıtse-mınıstri Berik Kamalıev zań jobasynyń negizgi maqsattary joldarda kóliktik baqylaýdy avtomattandyrý, teńiz kóligi salasyndaǵy halyqaralyq sharttardyń normalaryn ımplementatsııalaý, temirjol kóligindegi oqıǵalardy jáne kemelerde bolǵan avarııalyq jaǵdaılardy tergeý tártibin jetildirýge arnalǵanyn aıtty. Sonymen qatar, Qazaqstan Respýblıkasy zańnamasyn Halyqaralyq Azamattyq avıatsııa uıymy standarttarynyń talaptaryna jáne Eýropalyq Odaqtyń avıatsııalyq talaptaryna keltirý, áýeaılaq mańyndaǵy aýmaqta qyzmetti júzege asyrýǵa ruqsat alý tetigin retteý eskerilgen.
«Júkterdi avtomobılmen tasymaldaýdyń joǵary qarqyndylyǵy jol tóseminiń merziminen buryn buzylýyna jol bermeý boıynsha túbegeıli sharalardy qabyldaýdy talap etedi. Osy maqsatta «2020-2025 jyldarǵa arnalǵan Nurly jol» baǵdarlamasy boıynsha joldarda kólik quraldarynyń salmaqtyq jáne gabarıttik parametrlerin ólsheıtin avtomattandyrylǵan stantsııalardy ornatý josparlanýda. Zań jobasynda ólsheý stantsııalaryn ornatý jáne olardyń jumys isteý tártibin aıqyndaıtyn normalar kózdelgen», - dedi vıtse-mınıstr.
Onyń aıtýynsha, bul rette stantsııalar adamnyń qatysýynsyz «Sergek» qaǵıdaty boıynsha jumys isteıtin bolady. Usynylyp otyrǵan sharalardy iske asyrý avtojoldardyń saqtalýyn qamtamasyz etýge, aýyr salmaqty kólikterdiń jol júrgeni úshin bıýdjetke túsetin alymdar túsimin jyl saıyn 1,5 mlrd teńgege arttyrýǵa jáne avtojoldarda kóliktik baqylaý júrgizý kezinde adamı faktordy boldyrmaýǵa múmkindik beredi.
«Bıyldyń 31 naýryzynda Qazaqstan Respýblıkasy batyp ketken kemelerdi shyǵarý týraly 2007 jylǵy Naırobı halyqaralyq konventsııasyn ratıfıkatsııalady. Osyǵan baılanysty, zań jobasynda keme ıesiniń sýǵa batqan múlikti kóterý jónindegi óziniń azamattyq-quqyqtyq jaýapkershiligin saqtandyrý jónindegi mindetin belgileıtin Konventsııa talaptaryn ımplementatsııalaý jónindegi normalar kózdelgen. Usynylyp otyrǵan normalar Qazaqstanǵa sýǵa batqan kemeni kóterý boıynsha shyǵyndardy óteý týraly talaptardy tikeleı saqtandyrý kompanııasyna usynýǵa múmkindik beredi. Qazirgi tańda Qazaqstannyń aýmaqtyq sýlarynda batyp ketken 10 kemeniń, onyń ishinde ırandyq Tiba qurǵaq júk kemesiniń (2015 jyly batyp ketken) jáne reseılik «Araks» kemesiniń (2016 jyly batyp ketken) qaldyqtary bar», - dedi B.Kamalıev.