Qazaqstanda «ıAndeks Taksı» júrgizýshilerine áleýmettik jarna tólenedi

NUR-SULTAN. QazAqparat – Elimiz «ıAndeks Taksı»-diń basshylyǵymen júrgizýshilerge áleýmettik jarna tóleý jóninde kelisimge keldi. Bul týraly QR Eńbek jáne halyqty áleýmettik qorǵaý mınıstri Tamara Dúısenova málim etti, dep habarlaıdy QazAqparat tilshisi.

«Biz áleýmettik kodekske frılanserlerdiń eńbek quqyǵyn qorǵaýǵa qatysty ózgerister engizdik. Áleýmettik kodekske sáıkes azamattar kúnine 8, aptasyna 40 saǵat jumys isteýi tıis. Bul jerde áńgime tolyqqandy jumys isteıtin azamattarǵa qatysty. Al endi frılans bolyp nemese negizgi jumysynan keıin qosymsha eńbektenetin jumysshylardyń quqyǵy áli kúnge deıin zań arqyly rettelmegen. Men jaqynda ǵana elimizdegi 8 iri onlaın platformanyń basshylarymen kezdesý ótkizdim. Sol kezde basshylardan jumysshylar tótenshe jáne jazataıym jaǵdaıǵa ushyrap qalsa, qandaı saqtandyrý qarastyrylǵan degende, eshqandaı saqtandyrý joq degen jaýap aldym», - dedi Tamara Dúısenova «Qazaqstan» ulttyq telearnasynda bolǵan «Jedel jeli» baǵdarlamasynyń efırinde.

Mınıstr keltirgen málimetke sáıkes búginde túrli onlaın platformalarda 500 myńnan astam otandasymyz jumys istep jatyr.

«Keshe ǵana tsıfrlyq damý mınıstri Baǵdat Mýsınmen birge «ıAndeks Taksı»-diń basshylyǵymen kezdestik. Sol kezdesýde taksı júrgizýshilerine áleýmettik jarna tóleý jóninde kelisimge keldik», - deıdi vedomstvo basshysy.