Qazaqstanda volonterlik uıymdardyń sany 3 ese artty
«Qazir Qazaqstanda volonterler qozǵalysyn júıeli qoldaý maqsatynda kóp jumys júrip jatyr. Kómektesýge daıyn adamdardyń, ıaǵnı volonterlerdiń quqyǵy qorǵalýy da mańyzdy. Osyǵan deıin qabyldanǵan sharalardyń arqasynda sońǵy 3 jylda Qazaqstanda belsendi volonterler sany 4 ese jáne volonterlik uıymdar sany 3 ese ósti. Іske asyrylyp jatqan jobalardyń aýqymy ulǵaıdy. Volonterler úshin biryńǵaı aqparattyq platforma jumys isteıdi», - dedi Parlament Senatynyń tóraǵasy Máýlen Áshimbaev elordada ótip jatqan Ortalyq Azııa volonterler forýmy barysynda.
Senat spıkeriniń málimdeýinshe, elimizde volonterlikti damytýda Parlament aıtýly úles qosyp jatyr.
«Ótken sessııada biz Qazaqstan Respýblıkasyndaǵy aolonterlik qyzmetti damytý týraly zańǵa túzetýler engizip, qabyldadyq. Zańdaǵy ózgerister qazaqstandyqtardy ıgi ister jasaýǵa yntalandyrýǵa jáne volonterlerdiń quqyqtaryn keńeıtýge baǵyttalǵan. Sondaı-aq, zańnamaǵa memlekettik qyzmetke kirer kezde volonterlik eńbekti esepke alý týraly ereje engizildi. Odan bólek, volonterlerdi yntalandyrý úshin memlekettik nagradalarmen marapattaý sharasy qabyldandy. Sonymen qatar volonterlik uıymdarǵa kommýnaldyq múlikti senimgerlik basqarýǵa berý jónindegi norma kózdelgen», - deıdi ol.
Buǵan deıin qyrkúıekte elordada ótetin álemdik jáne dástúrli dinder kóshbasshylarynyń sezine 500-den astam volonter tartylatyny týraly habarlaǵan edik.
Aıta ketsek, Nur-Sultanda Ortalyq Azııa elderi volonterleriniń forýmy ótip jatyr .