Qazaqstanda «Vkýsno - ı tochka» taýar belgisi tirkelýi múmkin

ASTANA. QazAqparat – Elimizde «Vkýsno - ı tochka» taýar belgisin tirkeý ótinishi qaralyp jatyr. Atalǵan aqparatty QR Ádilet mınıstrliginiń baspasóz qyzmeti rastady, dep habarlaıdy QazAqparat tilshisi.

«Qazaqstan Respýblıkasynyń taýar belgileriniń memlekettik tiziliminde «Vkýsno - ı tochka» degen taýar belgisi tirkelmegen. Alaıda, saraptamalyq uıymnyń qaraýynda «Sıstema PBO» jaýapkershiligi shekteýli qoǵamdyǵy atynan túsken «Vkýsno - ı tochka» taýar belgisin tirkeýge qatysty ótinim bar», - dep habarlady atalǵan vedomstvonyń baspasóz qyzmetinen.

Mınıstrlikten habarlaǵandaı, «Ulttyq zııatkerlik menshik ınstıtýty» RMK saraptaý uıymynyń ónerkásiptik menshik obektileriniń memlekettik tizilimderi www.kazpatent.kz saıtynda qoljetimdi. Túsken ótinimder jáne tirkelgen ónerkásiptik menshik obektilerimen tanysý múmkindigi bar.

Sondaı-aq ótken jyly ótinim berilgennen keıin bir aıdyń ishinde atalǵan taýar belgisin tirkeýge qarsylyq bildirýge múmkindik beretin «oppozıtsııalyq» júıe engizilgeni atap ótildi.

Qarsylyq bildirgisi keletinder sanyna qatysty shekteý joq. Bul uqsas saýda belgileriniń ıeleri nemese taýarlyq belgini tirkeý olardyń quqyqtaryn buzady dep sanaıtyn kompanııalar bolýy múmkin.

Aıta ketsek, «Vkýsno - ı tochka» taýar belgisi Reseıde McDonald's jelisi jabylǵannan keıin ashylǵan fast-fýd meıramhanalar jelisi. Alǵash meıramhana byltyr 12 maýsymda ashyldy.

Eske salsaq, 5 qańtarda McDonald's kompanııasynyń Qazaqstandaǵy qyzmeti toqtatylatyny habarlandy.

Foto: vkusnoitochka.ru