Qazaqstanda vırýstyq ınfektsııalarǵa qarsy preparattardy daıyndaýǵa qansha qarjy bólingen
«Úkimet janyndaǵy Joǵary ǵylymı-tehnıkalyq komıssııa (JǴTK) otyrysynyń 2021 jylǵy 10 tamyzdaǵy hattamasymen Bilim jáne ǵylym mınıstrliginiń 2021 – 2023 jyldarǵa arnalǵan baǵdarlamalyq-nysanaly qarjylandyrý jónindegi konkýrsy aıasynda COVID-19-ǵa qarsy ósimdik shıkizatynan dárilik preparattardy ázirleý jónindegi ǵylymı-tehnıkalyq baǵdarlamany (ǴTB) qarjylandyrý maquldandy», - dep jazdy A. Mamın depýtattyq saýalǵa bergen jaýabynda.
Osy oraıda COVID-19 jáne uqsas vırýstyq ınfektsııalarǵa qatysty vırýsqa qarsy belsendiligi bar ósimdik shıkizatynan alynǵan tıimdiligi joǵary dárilik zattardy ázirleý eskerilgen. 3 jylǵa 500 mln teńge qarastyrylyp otyr.
Sonymen qatar, «COVID-19 jáne tumaýǵa qatysty tıimdi vırýsqa qarsy belsendiligi bar biregeı otandyq preparattardy ázirleý» aıasynda 3 jylǵa 900 mln teńge somasy josparlandy.
ǴTB iske asyrý barysynda alynǵan nátıjeler boıynsha klınıkaǵa deıingi synaqtar men klınıkalyq zertteýler aıasynda zertteýlerdi jalǵastyrý josparlanyp otyr.
«ǴTB-nyń áleýmettik-ekonomıkalyq áseri jappaı vırýstyq ınfektsııalardan bolatyn syrqattanýshylyq pen ólim-jitimdi tómendetýge, eldiń sanıtarııalyq-epıdemıologııalyq salamattylyǵyn qamtamasyz etýge múmkindik beretin jańa tıimdi otandyq dárilik preparattar ázirleýge negizdeledi. ǴTB-nyń ǵylymı áseri ósimdikter men mıkrobtardan shyqqan bıologııalyq belsendi qosylystardyń koronavırýs pen tumaý vırýstaryna áser etý mehanızmderi men joldary týraly jańa bilim alý bolyp otyr, bul vırýsqa qarsy jańa tıimdi preparattardy jasaýǵa negiz bolady. Bul ǴTB-lar Úkimette ótken keńeste egjeı-tegjeıli qaralyp, onyń qorytyndysy boıynsha memlekettik organdar men uıymdarǵa olardyń iske asyrylý barysy, sondaı-aq olardyń belgilengen merzimde nátıjeliligi týraly toqsan saıyn aqparat berýdi qamtamasyz etý tapsyryldy», - dedi Premer-Mınıstr.
«Fıtohımııa» halyqaralyq ǵylymı-óndiristik holdıngi» AQ memlekettik ǵylymı-tehnıkalyq saraptamadan ótken jáne Ulttyq ǵylymı keńes qarjylandyrýǵa usynym bergen «Biregeı dárilik preparattar óndirisin damytýdyń 2021 – 2023 jyldarǵa arnalǵan jańa tehnologııalary» ǴTB-ny ázirledi.
«Budan basqa, búgingi tańda ósimdikterdiń bıologııalyq áralýandyǵyn qorǵaý maqsatynda «Ósimdikter dúnıesi týraly» jáne «Qazaqstan Respýblıkasynyń keıbir zańnamalyq aktilerine ósimdikter dúnıesi máseleleri boıynsha ózgerister men tolyqtyrýlar engizý týraly» Qazaqstan Respýblıkasy zańdarynyń jobalary ázirlendi. Zań jobalarynyń retteý salasy tabıǵı jaǵdaılarda ósetin ósimdikter dúnıesi obektilerin, sondaı-aq olardyń genetıkalyq qoryn qaıta óndirý jáne saqtaý maqsatynda ósindi jaǵdaılarynda ustalatyn jabaıy ósetin ósimdikterdi qamtıdy. Qazirgi ýaqytta zań jobalary Qazaqstan Respýblıkasynyń Parlamenti Májilisiniń qaraýynda. Tutastaı alǵanda, COVID-19 qarsy ósimdik shıkizatynan otandyq tıimdi dárilik preparattardy jasaý máseleleri Úkimettiń baqylaýynda jáne osy baǵyttaǵy jumys jalǵasýda», - dedi A. Mamın.