Qazaqstanda vırtýaldy mýzeıler qurylady

ASTANA. QazAqparat - Astanada «Uly dalanyń uly órkenıetteri» jalpyulttyq tarıhı-rekonstrýktsııalar klýby qurylady. Bul týraly búgin elorda ákimi Baqyt Sultanov qala aktıvimen ótken jyldy qorytyndylaýǵa arnalǵan jıynda aıtty, dep habarlaıdy QazAqparat tilshisi.

«Bıylǵy jyly Memleket basshysynyń «Rýhanı Jańǵyrý» jáne «Uly dalanyń jeti qyry» baǵdarlamalyq maqalalaryn júzege asyrý boıynsha is-sharalar jalǵasatyn bolady. Olardyń aıasynda birneshe vırtýaldy mýzeıler qurý, muraǵattyq derekterdi tsıfrlaý, mektepterde ólketaný mýzeıi men tarıhı-arheologııalyq qozǵalystardy qurý josparlanýda», - dedi ol.

Ákim sózine qaraǵanda, Qazaqstan Respýblıkasynyń Mádenıet jáne sport mınıstrligimen birlesip Bozoq tarıhı-mádenı keshenin qurý jumystary júrgiziledi. Bozoq - halyqaralyq deńgeıdegi mádenı, týrıstik jáne ǵylymı-zertteý ortalyǵy, sondaı-aq Eýrazııa aımaǵyndaǵy arheologııalyq-etnografııalyq zertteý ǵylymı-ádistemelik bazasy bolady. Sonymen qatar, «Uly dalanyń uly órkenıetteri» jalpyulttyq tarıhı-rekonstrýktsııalar klýbyn qurý jáne onyń negizinde Astana jáne Qazaqstannyń óńirlerinde kóne saqtar, ǵundar, uly túrki qaǵandarynyń dáýiri taqyryptarynda festıval ótkiziledi.

«Kıeli Astana» jobasy aıasynda tarıhı eskertkishterdi zertteý úshin 4 arheologııalyq eskertkish aýmaǵynda ǵylymı ekspedıtsııalar uıymdastyrylyp, ımıdjdik ónimder shyǵarylady. Munyń barlyǵy elordadaǵy týrızmniń iskerlik kelbetin damytyp ǵana qoımaı, sonymen birge tarıhı-mádenı áleýetin arttyrady», - dedi Baqyt Sultanov.