Qazaqstanda veıptardy satýǵa jáne tutynýǵa tyıym salynady – Májilis

NUR-SULTAN. QazAqparat – Qazaqstanda veıp satýǵa jáne shegýge tyıym salynady. Bul týraly Májilis depýtaty Amanjan Jamalov aıtty, dep habarlaıdy QazAqparat tilshisi.

«Qazaqstanda veıpterdi satýǵa jáne paıdalanýǵa tyıym salatyn túzetýler engizý týraly sheshim qabyldadyq. Temeki qospasy, suıyqtyq, gaz – olardy Qazaqstanda satýǵa jáne paıdalanýǵa tolyq tyıym salynady», - dedi depýtat Májilis kýlýarynda bergen suhbatynda.

A. Jamalov Qazaqstanda qazir qyzdyrylatyn temekige (Aıkos, Glo) eshqandaı salyq salynbaıtynyn túsindirdi.

«Aǵzaǵa áseri, nıkotın mólsheri jáne basqa parametrler boıynsha bul DDSU tujyrymyna sáıkes, qarapaıym temekimen birdeı zııandy. Búgin depýtattar bul stıkterge aktsız salý sheshimin qabyldady. Olarǵa kádimgi temekige salynatyn aktsızderdiń 70%-y mólsherinde aktsız engizý uıǵaryldy», - dedi Májilis depýtaty.

Odan bólek, Densaýlyq saqtaý týraly kodekske suıyq jáne gaz túrindegi temeki qospalary bar elektrondyq qurylǵylar dep atalatyn veıptardy satýǵa jáne paıdalanýǵa tyıym salý jóninde túzetý engizildi.

«Túrli ıisti temekilerdi Qazaqstanda satýǵa jáne tutynýǵa tolyq tyıym salynady. Sondyqtan bul uǵymdar Salyq kodeksinen alynyp tastaldy», - dedi A. Jamalov.