Qazaqstanda veıp-ónimder aınalymyna tolyq tyıym salynýy múmkin
«Qazirgi ýaqytta Úkimet veıp-ónimderdi taratýǵa shekteýlerdi kúsheıtý máselesin qarastyrýda. Dúnıejúzilik densaýlyq saqtaý uıymynyń derekteri boıynsha 33 elde nıkotındi tutynýdyń elektrondyq júıeleri men veıpterdi satýǵa tyıym salynǵan. Olardyń qatarynda Danııa, Norvegııa, Ýrýgvaı, Argentına, Panama, Brazılııa, Meksıka, Kanada, Taıland, Úndistan, Gonkong, Sıngapýr, Malaızııa, Fılıppın, Lıvan, Katar, Oman, Iordanııa bar. Sondaı-aq 79 elde bul ónimderdi qoǵamdyq oryndarda paıdalanýǵa, olardy jarnamalaýǵa, nasıhattaýǵa jáne demeýshilikke tyıym salatyn nemese qaptamada densaýlyqqa zııan ekendigi týraly eskertýlerdi kórsetýdi talap etetin kem degende bir ishinara shara qabyldanǵan», - dep atap ótedi Úkimet basshysy jaýabynda.
Premer-Mınıstrdiń dereginshe, veıp-ónimniń aınalymyna tyıym salý normatıvtik quqyqtyq aktilerge túzetýler engizýdi kózdeıdi.
«Quqyqtyq aktiler týraly» Zańnyń 19-babynyń 3-tarmaǵyna sáıkes jeke kásipkerlik sýbektileriniń múddelerin qozǵaıtyn normatıvtik-quqyqtyq aktiler jobalaryna qatysty Kásipkerlik kodeks belgilegen jaǵdaılarda jáne tártippen retteýshilik áserge taldaý júrgiziledi. Osy jylǵy 31 mamyrda múddeli memlekettik organdardyń, qoǵamdyq birlestikterdiń, azamattyq qoǵam men bıznes-qoǵamdastyq ókilderiniń qatysýymen Kásipkerlik qyzmetti retteý máseleleri jónindegi vedomstvoaralyq komıssııanyń janyndaǵy Saraptama tobynyń otyrysy ótkizildi. Onda veıp-ónimderdi taratýǵa shekteýlerdi kúsheıtý boıynsha túrli usynystar qaraldy. Qazirgi ýaqytta veıp-ónimniń aınalymyna tolyq tyıym salýdy kózdeıtin norma retteýshilik áserge taldaý rásiminen ótýde. Úkimet osy normany qoldaıdy. Retteýshilik áserge taldaý qorytyndysy boıynsha kodekske túzetýler usynylatyn bolady», - dedi Álıhan Smaıylov.