Qazaqstanda veterınarııalyq pasport elektrondyq formatqa aýystyrylady

NUR-SULTAN. QazAqparat – Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine veterınarııa máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

Májilis depýtaty Roman Kımniń aıtýynsha, zań jobasymen 2 zańnamalyq aktige: «Qazaqstan Respýblıkasyndaǵy kedendik retteý týraly» kodekske jáne «Veterınarııa týraly» zańǵa ózgerister men tolyqtyrýlar engizilip otyr.

Zań jobasynyń negizgi maqsaty - Qazaqstan Respýblıkasynyń veterınarııa salasyndaǵy zańnamasyn odan ári jetildirý.

Atap aıtqanda, zań jobasymen veterınarııalyq pasportty elektrondyq formatta berý boıynsha memlekettik qyzmet kórsetý múmkindigi iske asyrylyp otyr. Kórsetiletin qyzmetti avtomattandyrý, buryn qaǵaz formatta daıyndaýǵa jiberiletin bıýdjet qarajatyn únemdeýge múmkindik beredi, adamı faktordyń áserin joıady, osy qujatty berýdi jeńildetedi jáne alýdy tezdetedi.

Sonymen qatar, sybaılas jemqorlyq quqyq buzýshylyqtardy jasaýdyń alǵysharttaryn barynsha azaıtý maqsatynda zań jobasynda memlekettik veterınarııalyq-sanıtarııalyq ınspektorlarǵa memlekettik veterınarııalyq-sanıtarııalyq baqylaý jáne qadaǵalaý júrgizý kezinde foto- jáne beınetúsirilimdi júzege asyrýǵa, sondaı-aq tehnıkalyq quraldardy paıdalanýǵa quqyq berý usynylýda.