Qazaqstanda veterınarııa júıesin reformalaý qalaı júrip jatyr

NUR-SULTAN. QazAqparat – Otandyq veterınarııa salasyn aýqymdy reforma kútip tur. Búginde Aýyl sharýashylyǵy mınıstrligi atalǵan salaǵa qatysty problemalarǵa taldaý jasap, ony sheshýdiń ádis-tásilderin qarap jatyr. Bul jaıynda QazAqparat tilshisine QR AShM veterınarııalyq baqylaý jáne qadaǵalaý komıtetiniń bas sarapshysy Altynbek Úrkinbaev tarqatyp aıtyp berdi.

«Otandyq agroónerkásiptik keshende sheshilýi tıis kúrdeli máseleler bar salanyń biri veterınarııa. Atalǵan sala pármendi júıeni quryp, reformalaý jáne eldegi epızootııalyq jaǵdaıdy turaqtandyrýdy talap etedi. Qoldanystaǵy júıeniń iske asyp jatqanyna qarmastan birqatar kemshil tustary bar. Veterınarııa salasyndaǵy problemalarǵa Memleket basshysy Joldaýynda nazar aýdardy. Osy oraıda bizdiń mınıstrlik veterınarııa salasynyń qazirgi jaǵdaıyna keshendi taldaý júrgizip, birqatar ózekti problemalardy anyqtady», - deıdi Altynbek Úrkinbaev.

Sarapshynyń aıtýynsha, veterınarııa salasyna qatysty máselelerdi sheshý úshin aýyl sharýashylyǵy mınıstrligi men jergilikti atqarýshy organdardyń fýnktsıonaldyq mindetteri men ókilettikterin qaıta qaraý qajet.

«Veterınarııa salasyn tsıfrlandyrý, derekterdi jınaý men qyzmetti avtomattandyrý jumysy qolǵa alynady. Sol sııaqty úı janýarlary syrǵalaryn skanerleýdi jedeldetý úshin arnaıy mobıldi qosymsha ázirleý josparlap otyr. Qosymshanyń kómegimen janýardyń jeke nómirin terý arqyly oǵan qatysty málimettermen (janýardyń kartochkasy) tanysýǵa bolady. Jáne veterınarııalyq is-sharalar jospary da sol jerde ornalastyrylady. Ázirlenetin mobıldi qosymshanyń basty artyqshylyǵy ınternetsiz de jumys isteıdi. Al ınternet paıda bolǵan kezde qosymsha derekterdi avtomatty túrde alý múmkindigi týady», - deıdi ol.

Sondaı-aq, mınıstrlik ókili veterınarııalyq preparattardy qoldanýdyń jańa aqparattyq júıesi ázirlenip jatqanyn jetkizdi.

«Ázirlenip jatqan aqparattyq júıede orny aýystyrylatyn, tasymaldanatyn obektilerdiń eksportyna, ımportyna jáne tranzıtine veterınarııalyq anyqtama, sertıfıkat pen ruqsat berýge qatysty «Biryńǵaı avtomattandyrylǵan basqarý júıesiniń» fýnktsııasyn keńeıtý josparlanýda. Sonymen qatar jańa aqparattyq júıede veterınarııa salasyndaǵy eseptilik, memlekettik baqylaý men qadaǵalaý, veterınarııalyq is-sharalar josparyn ázirleý protsesi avtomattandyrylady», - dedi A. Úrkinbaev.

Odan bólek, sarapshy veterınarııalyq preparattardyń derekter bazasy qurylatyny týraly tilge tıek etti.