Qazaqstanda veterınar dárigerlerdiń jalaqysy qandaı kólemde ósedi
«Respýblıka boıynsha mal dárigerleriniń ortasha jasy 40-55 jasty quraıdy. Veterınarlyq sektorda jas, joǵary bilikti kadrlar jetispeıdi. Qazirgi zamanǵy qoǵamnyń úrdisterimen teń tabys tabý múmkindiginiń bolmaýy, jumystyń qıyndyǵy, aýyldyq jerlerdegi ınfraqurylymnyń damymaýy jas mamandardyń mal dárigeri kásibine degen qyzyǵýshylyǵyn tómendetti», - dedi E. Qarashókeev.
Onyń aıtýynsha, bıylǵy 1 sáýirdegi jaǵdaı boıynsha Memleket basshysynyń tapsyrmasyna sáıkes, memlekettik tapsyrysty oryndaý úshin tarıfterdi kóterý esebinen respýblıka boıynsha orta eseppen veterınarııalyq mamandardyń jalaqysy 33,4%-ǵa ósti. Jyl sońyna deıin odan ári 60%-ǵa deıin ulǵaıtý josparlanyp otyr.
«Qazirgi ýaqytta kommýnaldyq veterınarlyq kásiporyndardyń ortasha aılyq jalaqysy óńirlerge baılanysty 80 myńnan (Qyzylorda oblysy) 206 myńǵa deıin (Pavlodar oblysy) teńgeni quraıdy. Alaıda, bul jetkiliksiz», - dedi mınıstr.
Bul máselelerdi sheshý úshin kelesi is-sharalar usynyldy:
1. Básekelestik sektory joq jerlerde kommýnaldyq veterınarııalyq kásiporyndar kórsetetin aqyly qyzmetter kólemin ulǵaıtý. Ol úshin barlyq jerde aqyly qyzmet túrleriniń tarıfteri bekitiledi.
2. Tıisti zańnamalyq bazany qabyldaı otyryp, kelesi jyldan bastap kommýnaldyq veterınarııalyq kásiporyndar veterınarııa mamandarynyń laýazymdyq jalaqysyna 50%-dyq qosymsha ústemaqy jáne zııandy eńbek jaǵdaılary úshin (patogendigi 1-shi jáne 2-shi sanattaǵy bıoagenttermen jumys isteý) memlekettik kommýnaldyq mekemelerdiń bazalyq laýazymdyq jalaqysyna 140%-dyq qosymsha aqy tóleý, sondaı-aq saýyqtyrý járdemaqysy retinde 2 laýazymdyq jalaqy tóleý. Bul sharalar mal dárigeri kásibiniń tartymdylyǵy men bedelin edáýir arttyrady.