Qazaqstanda venchýrlik ındýstrııanyń Ádep kodeksi qabyldandy

<p>ASTANA. KAZINFORM &mdash; Astana Hub halyqaralyq tehnoparki alańynda Qazaqstan venchýrlik ındýstrııasynyń Ádep kodeksine qol qoıý rásimi ótti. Qujat naryqtyń túrli oıynshylary, atap aıtqanda venchýrlik qorlar, ınvestorlar, bıznes-perishteler men startaptardyń basyn qosatyn negizgi qujattyń biri bolmaq.</p>

Munda ádeptilik, adaldyq, jaýapkershilik, senim, toleranttylyq, parasatty básekelestik, startaptar qyzmetine ınvestorlardyń aralaspaýy, startap múddelerin qorǵaý, zańdylyq, sybaılas jemqorlyqqa tózbeýshilik jáne qoǵamdyq tarap basymdyǵy sııaqty qaǵıdattar baıandalǵan.

«Venchýrlik kodeksti qurý ıdeıasy oıymyzda áýelden boldy. Amerıka naryǵynda startaptardyń ınvestorlar men jurtshylyqty adastyrǵan jaǵdaılar oryn alǵan edi. Osylaısha, búkil venchýrlik naryqtyń ımıdjine nuqsan keldi. Qazaqstanda mundaı jaǵdaıdyń aldyn alý maqsatynda osy Kodeksti qurýdy uıǵardyq. Ol – erikti, tártip sanktsııalary jáne zańdy kúshi joq. Biraq mundaǵy adaldyq, ádeptilik, ashyqtyq jáne toleranttylyq normalaryn saqtaýǵa qol qoıyp, jarııa mindetteme alý aıtarlyqtaı serpin beredi», – dedi Marat Tólibaev, Activat VC bas dırektory.

Atalǵan Ádep kodeksine ındýstrııa ókilderi saltanatty túrde qol qoıdy. Olardyń qatarynda: Astana Hub, BGlobal VC, MOST Ventures, MyVentures, Tumar Venture Fund, Activat VC, BigSky Capital, BYB Capital, InDrive NewVentures, sondaı-aq EasyTap, ApartX, Garderob, Porte, Smartestprep, GoDays, Billz startaptary jáne basqalary bar.

«Kodeks Qazaqstanda etıkalyq jáne ashyq venchýr naryǵyn qurý jolyndaǵy mańyzdy qadam bolmaq. Osy normalardy saqtap, IT-kásipkerlikti damytý jáne jańa ınvestıtsııalar tartý úshin qolaıly jaǵdaılar jasaı alamyz. Naryqtyń barlyq qatysýshysy kodekske qol qoıyp, onyń qaǵıdattaryn ustanady dep úmittenemiz», – dedi Tańat Óskembaev, Astana Hub basqarýshy dırektory.

Qol qoıýshylar pikirinshe, Ádep kodeksiniń normalaryn ustaný Qazaqstan venchýrlik naryǵynda ózara senim, izgi nıet pen yntymaqtastyqty qalyptastyrýǵa yqpal etedi. Osylaısha, ındýstrııaǵa da, onyń jekelegen qatysýshylaryna da teris áser etýi múmkin jaǵdaılardyń aldyn alýǵa súbeli úles qosady.