Qazaqstanda valıýtalyq ıpotekany qaıta qarjylandyrý merzimi uzartyldy

ALMATY. QazAqparat - QR Ulttyq banki basqarmasynyń qaýlysymen Ipotekalyq qaryzdardy qaıta qarjylandyrý baǵdarlamasyna jeke tulǵalardyń 2016 jylǵy 1 qańtarǵa deıin berilgen valıýtalyq ıpotekalyq qaryzdaryn qaıta qarjylandyrý merzimi uzartyldy. Bul týraly QR UB baspasóz qyzmetinen málim boldy, dep habarlaıdy QazAqparat.

QR Ulttyq banki tóraǵasy Danııar Aqyshev bıylǵy naýryzdan bastap baǵdarlama aıasynda bankter jeke tulǵalardyń valıýtalyq ıpotekalyq qaryzdaryn UB-nyń 2015 jylǵy 18 tamyzdaǵy baǵamy boıynsha (bir AQSh dollary úshin 188,35 teńge) teńgemen qaıta qarjylandyrýdy júzege asyryp jatqandyǵyn atap ótti.

«Búginde bankter 40,1 mlrd teńge kólemindegi somaǵa 5 131 ótinimdi qaıta qarjylandyrýǵa maquldady. 27,7 mlrd teńge kóleminde 3 845 qaryz qaıta qarjylandyryldy. Valıýtalyq ıpotekalyq qaryz alýshylardy baǵdarlamamen barynsha qamtý maqsatynda valıýtalyq ıpotekalyq qaryzdardy qaıta qarjylandyrý merzimi 2019 jylǵy 15 shildege deıin uzartyldy», - dedi D. Aqyshev.

Baǵdarlamaǵa engizilgen túzetýlerdi eskere otyryp, qaryz alýshylar kredıtor bankke 2019 jylǵy 1 shildeden keshiktirmeıtin merzimde qaıta qarjylandyrýǵa ótinish berýi qajet.

UB basshysy valıýtalyq ıpotekalyq qaryzdardy qaıta qarjylandyrýǵa Ulttyq banktiń qarajatynan bankterge qaıtarymdy negizde 156 mlrd teńge bólinetinin habarlady.

«Memlekettik-jekeshelik áriptestik aıasynda bankter qaryz alýshylardyń syıaqy, komıssııalar jáne turaqsyzdyq aıyby (ósimpul) boıynsha 136 mlrd teńgeden astam somaǵa bereshegin keshiretin bolady», - dedi Danııar Aqyshev.

Sonymen qatar ol QR Ulttyq banki qazirgi ýaqytta múlki bankterdiń balansynda turǵan ıpotekalyq qaryz alýshylardy qoldaýdyń sońǵy satysyna kiriskenin atap ótti.