Qazaqstanda «Úzdik aýyl ákimi» anyqtalady
Bul týraly QR Memlekettikqyzmet isteri agenttiginiń Facebook paraqshasynan málim boldy, dep habarlaıdy QazAqparat.
«Memleket Basshysy Qasym-Jomart Toqaev óziniń Qazaqstan halqyna Joldaýynda «Halyq únine qulaq asatyn memleket» tujyrymdamasy barlyq azamattardyń ótinishterine jedel jáne tıimdi áreket etýge baǵyttalýy tıis ekenin atap ótti.
Aýyl ákimi halyqpen tikeleı ózara is-qımylda bolady jáne baılanysty ornata alý qabileti, turǵyndardyń ózekti máseleleri boıynsha der kezinde sheshim qabyldaı bilýi onyń qyzmetiniń basty baǵyty bolyp tabylady.
Jergilikti deńgeıde ákim memlekettik saıasatty júrgizýshi jáne onyń is-áreketi boıynsha halyq arasynda jalpy memlekettik basqarýdyń tıimdiligine qatysty kózqarasy qalyptastady»,-delingen habarlamada.
Memlekettik qyzmet isteri agenttigi «Rýhanı Jańǵyrý» baǵdarlamasy aıasynda jergilikti ózin-ózi basqarýdy damytýǵa jáne jergilikti mańyzy bar máselelerdi tıimdi sheshýge úles qosqan, jumysta joǵary praktıkalyq nátıjelerge jetken úzdik aýyl ákimderin anyqtaýǵa jáne kótermeleýge baǵyttalǵan «Úzdik aýyl ákimi» respýblıkalyq konkýrsyn jarııalaıdy.
Baıqaý 25 mamyrda bastalyp, eki negizgi kezeńde ótedi:
I kezeń-óńirlik deńgeı (oblystyq deńgeı);
II kezeń-respýblıkalyq deńgeı.
Baıqaý nátıjeleri 2020 jyldyń qyrkúıek aıynda belgili bolady. Konkýrs ótkizý barysynda halyqtyń pikiri eskeriledi.
Aǵymdaǵy jyldyń maýsym aıynan bastap oblys ákimdikteriniń resmı saıttarynda jergilikti ákimniń tıimdi jumys isteýine halyqtyń qanaǵattanýyn baǵalaý úshin saýalnama ornalastyrylatyn bolady.
Saýalnamaǵa azamattardyń quqyqtary men zańdy múddelerin qorǵaý, memlekettik qyzmetter kórsetý boıynsha qabyldanǵan sharalardyń tıimdiligi, kópbalaly jáne az qamtamasyz etilgen otbasylarǵa, halyqtyń áleýmettik osal toptaryna kómek jáne qoldaý kórsetý, halyqty jumyspen qamtý men jumysqa ornalastyrýǵa járdemdesý, jergilikti áleýmettik ınfraqurylymdy damytý, jergilikti qoǵamdastyqpen ózara is-qımyl jáne t. b. sııaqty birqatar baǵalaý krıterııi kiredi.
Sonymen qatar, árbir óńirdiń Ádep jónindegi ýákilderi úmitkerlerdiń memlekettik qyzmetshilerdiń ádep normalaryn saqtaýy máseleleri boıynsha anonımdik saýalnama júrgizetin bolady.
Saýalnama nátıjeleri konkýrstyq komıssııanyń árbir aýyl ákimin obektıvti baǵalaýǵa múmkindik beredi.
Konkýrs ótkizý erejesi týraly tolyq aqparat Memlekettik qyzmet isteri agenttiginiń www.gov.kz saıtynda jáne oblys ákimdikteriniń resmı saıtynda ornalastyrylǵan.