Qazaqstanda uıaly baılanys qyzmetiniń quny qansha

<p>ASTANA. KAZINFORM &ndash; Búginde ómirimizdi uıaly telefonsyz elestetý múmkin emes. Smartfondy eńbektegen baladan eńkeıgen qartqa deıin qoldanady. Alaıda, baılanys operatorlarynyń qyzmetinsiz olardyń quny kók tıyn. Sondyqtan olardyń qyzmetine telefon ustaǵan kez kelgen adam júginýge májbúr. Osyǵan oraı <a href="https://www.inform.kz/ru/skolko-stoyat-uslugi-mobilnoy-svyazi-v-kazahstane-17ebb4" target="_blank" rel="noopener">Kazinform</a> tilshisi uıaly baılanys qyzmetiniń qunyna sholý jasady.</p>

Qazaqstandyqtar úshin eń arzan ári barynsha tıimdi tarıfti anyqtaý óte qıyn. Munda tutynýshyǵa qajet nárse mańyzdy ról atqarady: ınternet gıgabaıttary nemese telefonmen sóılesý mınýttary. Reıtıngke kóptegen qazaqstandyqqa belgili 5 uıaly baılanys operator ilikti. Baǵany saralaý barysynda belgili bir kompanııanyń eń qymbat tarıfterin de eskerdik.

Baǵasynyń arzandyǵy jaǵynan birinshi oryndy Tele2 operatoryna berýge bolady. Kompanııanyń eń arzan standartty tarıfi 3 590 teńge turady. Bul aqshaǵa siz 11 gıgabaıt ınternet pen 100 mınýttyq telefon qońyraýyn ala alasyz. Aıta keterligi, tarıfti tańdaǵan kezde sharttaryn ózgertýge bolady. Aıtalyq, uıaly baılanys mınýttary esebinen trafıkti kóbeıte alasyz. Al eń qymbat tarıf 6 590 teńgeni quraıdy. Atalǵan somaǵa 35 gıgabaıt pen 340 mınýtty usynady jáne bul jaǵdaıda da shartyn ózińiz ózgerte alasyz. Tele2-de mektep oqýshylaryna arnalǵan 990 teńgelik bilim berý tarıfi bar. Oǵan 7 gıgabaıt trafık pen 50 mınýttyq qońyraý kiredi. Dál osyndaı jeńildikti baǵamen zeınetkerler jáne múmkindigi shekteýli jandar uıaly baılanys qyzmetin qoldana alady.

Infografıka: Kazinform

Qoljetimdiligi jaǵynan ekinshi orynda Activ keledi. Mundaǵy eń arzan tarıf 3 690 teńgeni quraıdy jáne osy somaǵa paıdalanýshy 10 gıgabaıt, sondaı-aq 100 mınýt sóılese alady. Eń qymbat tarıf quny — 9 690 teńge. Biraq sharttar aıtarlyqtaı jaqsy: shekteýsiz ınternet jáne 350 mınýttyq baılanys. Sondaı-aq, kompanııada 990 teńgege bilim berý tarıfi jáne jeke «balalar» tarıfi bar. Onyń quny — 3 990 teńge. Aıtpaqshy, otbasylyq tarıf ornatýǵa múmkindik bar. ıAǵnı, bir adam tólem jasap, ıgiligin birneshe adam kóre alady.

Qyzmet kórsetý quny arzandyǵy jaǵynan úshinshi orynda ALTEL operatory tur. Bul jaǵdaıda kompanııa tarıfti óz betinshe jınaýǵa múmkindik usynady. Eń arzan standartty jıyntyq qyzmetiniń quny 3 990 teńge bolady. Bul aqshaǵa abonent 15 gıgabaıt trafık pen 100 mınýttyq baılanys alady. Eger ámııanyńyz qalyń bolsa, onda eń qymbat tarıf 9790 teńgeni quraıdy. Onda shekteýsiz ınternet pen sóılesýge 300 mınýt qoljetimdi bolady. 1 090 teńgege jeńildikti tarıf jáne 990 teńgege bilim berý tarıfi de bar.

Odan keıingi orynda — Kcell. Onda 4 990 teńgeden tómen baǵaǵa standartty jıyntyq ala almaısyz. Bul aqshaǵa 18 gıgabaıt ınternet jáne 180 mınýttyq baılanys usynylady. Oǵan qosa, qalalyq telefonǵa qońyraý shalý úshin 10 mınýt beriledi. Shekteýsiz ınterneti, 480 mınýttyq baılanysy jáne qosymsha 40 mınýttyq qalalyq baılanysy bar tarıfiniń quny — 10 990 teńge

Reıtıngte eń qymbat qyzmetti Beeline usynady. Kompanııanyń resmı saıtyndaǵy málimetke sáıkes, eń arzan tarıftiń quny — 5 999 teńge. Bul soma úshin operator 10 gıgabaıt ınternet jáne barlyq baǵytqa qońyraý shalýǵa 100 mınýt berýge daıyn. Sharttary jalpy alǵanda, basqa da uıaly baılanys operatorlarymen birdeı desek bolady. Biraq eń qymbat tarıfi qazirdiń ózinde 11 999 teńgeni quraıdy jáne bul aqshaǵa siz shekteýsiz ınternetti ala alasyz. Sonymen qatar telefon arqyly sóılesýge 300 mınýt jáne halyqaralyq qońyraýǵa 30 mınýt beriledi. Sondaı-aq, úıde shekteýsiz ınternetti qosýdy kózdeıtin kóptegen otbasylyq tarıftik toptamasy bar.

Tarıfti qosý kezinde árbir operator jeli ishinde sheksiz qońyraýlar beretinin eskerý mańyzdy. Aıtalyq, Activ pen Kcell operatorlary arasynda, sondaı-aq Tele2 men Altel arasynda shekteýsiz qońyraý shala alasyz.