Qazaqstanda ýtıl alymy joıylmaıtyn boldy
2024 jylǵy 27 mamyrda mınıstrlikke «QR halqy ýtıl alymy jáne bastapqy tirkeýge qarsy» atty petıtsııa túsken bolatyn.
"QR Ákimshilik rásimdik-protsestik kodeksiniń 90-5-babyna sáıkes, Mınıstrlik tarapynan 2024 jylǵy 4 maýsymda petıtsııada kórsetilgen máselelerdi qaraý úshin jumys toby qurylyp, oǵan zańnamaǵa sáıkes múddeli memlekettik organdardyń ókilderi, Parlament depýtattary, ótinish berýshi jáne onyń ókilderi, sondaı-aq qoǵamdyq birlestikter kirdi.
Jumys tobynyń otyrystaryn ótkizý boıynsha is-sharalar jospary ázirlendi, onda Kókshetaý, Almaty, Semeı, Qostanaı qalalaryndaǵy mashına jasaý kásiporyndaryna barý boldy, oǵan «KAMAZ-Injınırıng», «Kazrost Engineering Ltd.», «Qazaqstan agroınnovatsııalyq korporatsııasy», «Hyundai Trans Almaty», «Hyundai Trans Kazakhstan», «SemAZ», «Daewoo Bus Kazakhstan» zaýyttary kirdi.
Petıtsııany qaraý barysynda onyń avtory men bastamashyl toby qaıta óńdeý tólemin engizý básekelestiktiń buzylýyna ákelip soqtyrǵanyn jáne sonyń saldarynan avtokólikterdiń, aýylsharýashylyq tehnıkalary men arnaıy tehnıkalardyń baǵasynyń kúrt ósýine sondaı-aq avtokólik parkiniń eskirýine ákeldi degen ýájderin aıtty. Sondaı-aq petıtsııada «Jasyl Damý» AQ ýtılızatsııalaý jónindegi mindettemelerin oryndamaı, Ekologııalyq kodeks talaptaryn buzyp otyrǵany aıtylǵan.
Ýákiletti memlekettik organdar men uıymdar ótinishtiń dálelderimen jáne oǵan kelip túsken eskertýlermen kelispeıtinin bildirdi.
QR ÓQM petıtsııany qanaǵattandyrýdan bas tartý týraly sheshim qabyldady" delingen vedomstvo habarlamasynda.
QR ÁRPK-niń 91-babyna sáıkes, atalǵan jaýappen kelispegen jaǵdaıda, petıtsııa berýshi ákimshilik aktini qabyldaýǵa baılanysty áreketke (áreketsizdikke) shaǵym jasaýǵa quqyly.