Qazaqstanda ushqyshsyz apparattar qurastyryldy
Osy ýaqytqa deıin Qazaqstan ǵarysh sapary jerdi qashyqtan zondaý júıesin iske qosyp, ǵaryshtan sýret túsiretin eki jer serigin ushyrdy. Osynyń arqasynda san alýan memlkettik organdar úshin 12 myńnan astam fotosýret jasaldy. Olardyń ishinde Qorǵanys mınıstrligi, tótenshe jaǵdaılar, avtomobıl joldary, azamattyq avıatsııa komıtetteri, Energetıka mınıstrligi, prokýratýra, shekara qyzmeti, tipti esirtki bıznesine qarsy kúres departamenti de bar. Endigi kezekte «Qazaqstan ǵarysh sapary» ulttyq kompanııasy ushqyshsyz apparattardy qurastyrý jumysyn qolǵa aldy. Sebebi ondaı apparattarǵa kóp shyǵyn ketpeıdi. Oǵan qosa, joǵary sapaly sýretterdi jerge jaqyn qashyqtyqtan túsirýge múmkindik bar.
«Endi, keıbir adamdar dúkende oktokopter, kvadrokopter sııaqty qytaılyq apparattar tolyp tur ǵoı dep aıtýy ábden múmkin. Biraq onyń barlyǵy - shaǵyn qurylǵylar. Sosyn ondaǵy qural-jabdyqtar bizge qajetti jumysty oryndaı almaıdy. Al bizdiń mamandar qurastyrǵan apparattarda úsh birdeı kamera ornatylǵan. Ekeýi joǵary dáldigi bar kamera bolsa, úshinshisi - ınfraqyzyl kamera. Mine, osyndaı qýattylyqtyń arqasynda qajetti jumysty atqarýǵa bolady», - deıdi «Qazaqstan ǵarysh sapary» ulttyq kompanııasynyń prezıdenti Erǵazy Nurǵalıev.
Onyń aıtýynsha, kompanııada qurastyrylǵan ushqyshsyz apparattardy orman sharýashylyǵynda, munaı men gaz óndirisinde, energetıkada, aýyl sharýashylyǵy jerlerin baqylaýda, qorshaǵan ortany qorǵaýda, tótenshe jaǵdaılardyń aldyn alýda jáne taǵy basqa kóptegen salalarda qoldanýǵa bolady. Máselen, qandaı da bir apat kezinde ushqyshsyz apparat ınfraqyzyl kameranyń arqasynda zardap shekken adamdy avtomatty túrde ózi taýyp, sıgnal berip otyrady.
Búginde bir oktokopter 50 myń dollarǵa baǵalanyp otyr. Alaıda kompanııa basshylyǵy ol apparattardy satpaı, tapsyrystardy alyp, qyzmet kórsetýden paıda tabýdy kózdep otyr.