Qazaqstanda ushaqta tártip buzǵan jolaýshylar «qara tizimge» sot sheshimimen engiziledi

NUR-SULTAN. QazAqparat – Azamattyq avıatsııa salasynda zańnamaǵa ózgerister engiziledi. Bul týraly Májiliste zańnamalyq aktilerge kólik máseleleri boıynsha ózgerister engizý týraly zań jobasyn tanystyrý kezinde QR Indýstrııa jáne ınfraqurylymdyq damý vıtse-mınıstri Berik Kamalıev aıtty, dep habarlaıdy QazAqparat tilshisi.

Belgili bolǵandaı, áýe kompanııalaryna áýe tasymaly shektelgen adamdardyń jeke tizilimin júrgizýge múmkindik beretin norma engiziledi. Alaıda azamattar mundaı tizimge tek ushaq bortyndaǵy quqyq buzýshylyqtar úshin jáne olardy qylmystyq nemese ákimshilik jaýapqa tartý nátıjesinde olardyń kinási dáleldengen jaǵdaıda ǵana kire alady.

Osy oraıda Májilis depýtaty Albert Raý atalǵan máselede halyqaralyq tájirıbe qalaı iske asyrylatynyn surady.

«Bizge Lufthansa, Túrkııanyń áýe jelisi saparlaıdy. Olar ushaq bortynda janjal shyǵarǵan adamdardy tizimge qalaı engizedi? Ne úshin zań jobasynda bizde sot sheshimimen engizý usynylǵan?», - dedi A. Raý.

Óz kezeginde B. Kamalıev elimizde áýe kompanııalary jolaýshylardy «qara tizimge» ózderiniń sheshimimen engizetinin aıtty.

«Oqıǵalardyń 99 paıyz jaǵdaıynda bul Air Astana-ǵa qatysty, olarda ózderiniń tizimi bar. Biz tıisti talqylaýlar men bolǵan oqıǵalardy pysyqtaı kele, janjal shyǵarǵan adamdardy tek sot sheshimimen tizimge engizýdi surap otyrmyz», - dedi vıtse-mınıstr.

Budan bólek, zań jobasy aıasynda «ushqyshsyz avıatsııalyq júıe» jáne «ushqyshsyz áýe kemesi» uǵymdary engiziledi.

Onyń aıtýynsha, zań jobasynda birinshi basshynyń azamattyq avıatsııa salasyndaǵy ýákiletti uıymǵa júktelgen mindetterdi oryndaǵany úshin derbes jaýapkershiligi jáne avıatsııa ınspektorlarynyń ózderiniń qyzmettik mindetterin oryndamaǵany nemese tıisinshe oryndamaǵany úshin jaýapkershiligi kózdeledi.

Budan buryn habarlanǵandaı, júkterdi avtomobılmen tasymaldaýdyń joǵary qarqyny jol tóseminiń merziminen buryn buzylýyna jol bermeý boıynsha túbegeıli sharalardy qabyldaýdy talap etedi.

Joldarda kólik quraldarynyń salmaqtyq jáne gabarıttik parametrlerin ólsheıtin avtomattandyrylǵan stantsııalardy ornatý josparlanýda. Zań jobasynda ólsheý stantsııalaryn ornatý jáne olardyń jumys isteý tártibin aıqyndaıtyn normalar kózdelgen