Qazaqstanda úsh baǵyttaǵy áleýmettik jobalarǵa baıqaý jarııalandy

NUR-SULTAN. QazAqparat - QR Aqparat jáne qoǵamdyq damý mınıstrligi, «Atameken» QR Ulttyq kásipkerler palatasy jáne «Azamattyq bastamalardy qoldaý ortalyǵy» KEAQ «ASAR» úshjaqty yntymaqtastyq ІІІ Respýblıkalyq forýmy sheńberindegi áleýmettik jobalar saıysyn jarııalaıdy.

Uıymdastyrýshylardyń málimetinshe, baıqaýǵa jergilikti qaýymdastyqty damytýǵa, jergilikti máselelerdi sheshýge turǵyndardyń áleýetin tartýǵa jáne osy aımaqtardaǵy ómir deńgeıin kóterýge baǵyttalǵan jobalar qatystyrylady.

Platforma úsh baǵyt boıynsha júzege asyrylady. Olar: ESO-ASAR (qorshaǵan ortany qorǵaý boıynsha máselelerdi sheshýge, halyqty ekologııalyq mádenıetke baýlýǵa jáne ósip kele jatqan býynnyń ekologııalyq máseleler jaıynda bilim deńgeıin kóterýge baǵyttalǵan jobalar), IT-ASAR (sandyq júıege kóshirý arqyly jergilikti qaýymdastyń máselelerin sheshýge baǵyttalǵan jobalar), INCLUSIVE-ASAR (ınklıýzıvti qoǵamdy damytýǵa baǵyttalǵan jobalar).

«Platformaǵa qatysý úshin 24 mamyrǵa (Nur-Sultan ýaqytymen saǵat 18.00-ge deıin) deıin [e-mail] elektrondyq poshtasyna ótinim jiberý qajet.

Ótinim kórsetilgen nysanǵa sáıkes toltyrylady jáne ótinimge mindetti túrde slaıd (10 betke deıin), beınerolık (uzaqtyǵy 3 mınýtqa deıin), ınfografıka (5 danaǵa deıin) túrindegi prezentatsııalyq materıal tirkelýi tıis», delingen habarlamada.

Barlyq ótinim jınalǵannan keıin Azamattyq bastamalardy qoldaý ortalyǵynyń onlaın alańynda ashyq jarııalanymda bolady jáne kásipkerlerge taratylady.

Barlyq suraqtarǵa qatysty maǵlumat Azamattyq bastamalar ortalyǵynyń telefony arqyly beriledi: 8 (7172) 22 11 32 [e-mail].

Platformaǵa qatysý boıynsha tolyǵyraq aqparat Áleýmettik jobalar platformasynyń erejesinde kórsetilgen.