Qazaqstanda úsh aýysymdy mektepter máselesi qalaı sheshilip jatyr

<p>2024-2025 jyldary 740 myń oqýshyǵa shaqtalǵan 369 mektep paıdalanýǵa beriledi. Bul týraly Qazaqstannyń ornyqty damý salasyndaǵy ulttyq maqsattar men mindetterdi iske asyrý monıtorıngi jónindegi Parlamenttik komıssııa otyrysynda Oqý-aǵartý mınıstri Ǵanı Beısembaev aıtty, dep habarlaıdy QazAqparat tilshisi.</p>

«Apatty, úsh aýysymdy mektepter men oqýshy oryndarynyń tapshylyǵy máselesin sheshý úshin tek keıingi 3 jylda 380 myń oqýshy ornyna arnalǵan 626 mektep paıdalanýǵa berildi», - dedi Ǵ. Beısembaev.

Osy oraıda mınıstrlik málimetine qaraǵanda, 2020 jyly 81 myń oryndyq 102 mektep, 2021 jyly – 163 myń oryndyq 277 mektep, sondaı-aq 2022 jyly 136 myń oryndyq 247 mektep tapsyryldy.

«Bıyl elimizde 137 myń oqýshy ornyna arnalǵan 165 mektepti paıdalanýǵa berý josparlanǵan. Bul óz kezeginde bıyl 12 apatty jáne 29 úsh aýysymdy mektep máselesin sheshýge baǵyttalǵan. Jalpy, mektep ınfraqurylymyn damytý maqsatynda «Jaıly mektep» ulttyq jobasy bekitilgeni belgili. Joba aıasynda 2024-2025 jyldary 740 myń oqýshy ornyna arnalǵan 369 mektepti paıdalanýǵa berý eskerilgen», - dedi vedomstvo basshysy.

Aıta keteıik, 2021 jyly 9 apatty jáne 31 úsh aýysymdy mektep, 2022 jyly 6 apatty, 19 úsh aýysymdy mektep máselesi sheshildi.