Qazaqstanda ýran óndirýshi kompanııalarǵa jańa mindetter júktelmek
Ádilet mınıstrliginde ótken vedomstvoaralyq komıssııa otyrysynda májilismender kótergen «QR jer qoınaýy jáne jer qoınaýyn paıdalaný» Kodeksine ózgerister men tolyqtyrýlar engizý týraly» zań jobasynyń ýran óndirý máselesi boıynsha bóligi qaraldy.
«Biz ýran qory boıynsha álemde kóshbasshymyz. Sol sebepti ınvestorlar bizge kelgende zańnamalyq talaptar aıqyn rettelip turý kerek. Ýran óndirý kelisimshartynyń merzimin uzartý máselesi ınvestorlar úshin óte mańyzdy. Biraq kelisimshart merzimin uzartý – ınvestıtsııalyq mindettemeler aıasynda iske asýy tıis dep talap qoıyp otyrmyz. Sebebi ınvestorlar ýran óndiriletin óńirlerdegi halyqtyń radıatsııalyq qaýipsizdigi men qorshaǵan orta tazalyǵyna ǵana emes, aımaq ekonomıkasynyń damýyna, qosymsha jumys oryndarynyń ashylyp, áleýmettik ınfraqurylymnyń qalyptasýyna kóńil bólýi kerek», - dedi QR Parlament Májilisiniń Ekologııa jáne tabıǵat paıdalaný máseleleri boıynsha komıtet múshesi Irına Ýnjakova vedomstvoaralyq komıssııanyń otyrysynan keıin tilshilerge.
Onyń aıtýynsha, 2019 jyldyń 1 qańtaryndaǵy zań talaby boıynsha jer qoınaýyn paıdalanýshylar ýran qory alǵash kórsetilgen mólsherden kóp ekeni anyqtalǵan jaǵdaıda kommertsııalyq bonýs retinde artyq qordyń bir paıyzyna teń tólem aýdarý kerek. Jańadan usynylyp otyrǵan zań talabynda bul bonýs áli naqtylanbaǵan. Biraq bul talap ýran qory bastapqy mólsherden 30 paıyzǵa paıyz artyq bolǵanda ǵana aýdarylady.
Al Energetıka vıtse-mınıstri Áset Maǵaýovtyń aıtýynsha, buryn ýran kenishinen qosymsha qor tabylsa, salyq organdary kommertsııalyq bonýsty talap etip kelgen kórinedi. Al qosymsha qordyń bary dáleldenbese, shyqqan shyǵyndy eshkim qaıtarmaıtyn.
«Endi barlaý kompanııalaryn yntalandyrý úshin bul bonýsty alyp tastadyq. Onyń ornyna eleýli mólsherde qosymsha ken tabylsa, ınvestor belgili bir paıyzyn jergilikti aımaqtyń damýyna baǵyttaıtyn bolady. Osyǵan baılanysty endi ınvestor óz jobasymen birge óńirdi damytýǵa qatysty josparlaryn da usynýǵa mindetteledi. Bul ózgeriske birinshi kezekte memleket múddeli», - deıdi Áset Maǵaýov.