Qazaqstanda ultaralyq tatýlyqtyń buzylýyna eshqandaı negiz joq - Qazaqstan halqy Assambleıasy
«Elimizde ultaralyq qarym-qatynastyń buzylýyna eshqandaı negiz joq» - dedi QR Parlamenti Májilisiniń depýtaty, «Vaınah» sheshen jáne ıngýsh halyqtarynyń mádenıetin damytý qaýymdastyǵynyń tóraǵasy Ahmed Muradov búgin Astanada Ortalyq kommýnıkatsııalar qyzmetinde ótken baspasóz maslıhatynda.
Óz kezeginde Qazaqstan halqy Assambleıasy hatshylyǵynyń meńgerýshisi Eraly Toǵjanov «ulysaralyq másele - ekiniń biri talqylaı beretin taqyryp emes» ekendigin atap ótti.
«Bul bir kirpııaz dúnıe. Onymen búginde sarapshylar aınalysady. Bul úshin bizde ǵylymı sarapshylyq keńes pen ulysaralyq zertteý ortalyǵy qurylǵan. Olar barlyq áleýmettik saýalnama júrgizý boıynsha ortaq ádisteme ázirleýmen aınalysady. Ortalyq sonymen qatar, osy salada ortaq memlekettik saıasat júrgizýdi qolǵa alǵan», - dedi ol.
Eraly Toǵjanov sondaı-aq bul qurylymnyń barlyq memlekettik qyzmetkerlerdi, ákimderdiń ıdeologııa boıynsha orynbasarlaryna deıin oqytýmen aınalysatyndyǵyn jetkizdi. Eki jyl ishinde 1398 adam osy ortalyqta ultaralyq tatýlyq máseleleri boıynsha biliktilikterin damytypty. Qazaqstan halqy Assambleıasy tóraǵasynyń orynbasary: etnomádenı birlestikter jetekshileriniń ózderin de ultaralyq máseleler boıynsha oqytý kerek, dep sanaıdy.
«Búginde QR Prezıdenti janyndaǵy Memlekettik basqarý akademııasynda da osyndaı jumystar júrýde. Onda arnaıy ortalyq ashylǵan. Bıyl Akademııanyń uıymdastyrýymen barlyq óńirlerde osy salada iri jobalardy júzege asyrý josparlanǵan», - dedi ol.