Qazaqstanda úlestik turǵyn úıdiń shamamen 70% zańsyz salynady

<p>Qazaqstan Turǵyn úı kompanııasy eldegi úlestik baspanalardyń kóleńkeli naryǵyna zertteý júrgizip, úlestik turǵyn úı keshenderiniń shamamen 68%-y zańsyz salynatynyn anyqtady, dep habarlaıdy Kazinform agenttiginiń tilshisi.</p>

Nysandardy irikteý tanymal jyljymaıtyn múlik saıttarynyń ashyq derekteri negizinde júrgizilgen. Elimizdiń 20 qalasynda jalpy sany 586 nysan salynyp jatyr.

«Biz keń taralǵan „qupııa satyp alýshy“ ádisin tańdadyq. Zertteý úsh tásilmen júrgizildi: satý keńselerine betpe-bet kelý, telefon arqyly qońyraý shalý, sondaı-aq elektrondy hattar men túrli messendjerler arqyly suraý jiberý arqyly izdedik», — dep túsindirdi «Qazaqstan Turǵyn úı kompanııasy» AQ basshysynyń orynbasary Altaı Kúzdebaev.

Onyń aıtýynsha, zertteý nátıjeleri tań qaldyrarlyq bolǵan, úlestik turǵyn úıdiń shamamen 68%-y zańsyz jolmen tartylady.

«586 nysannyń 400-ge jýyǵy kóleńkede ornalasqan. Ókinishke qaraı, bul bizdiń azamattarymyzdyń aqshasy zańsyz jolmen tartylatynyn kórsetedi. Biz qurylys salýshylarǵa azamattardyń aqshasymen jumys isteıtinderin túsindiremiz, ekinshi deńgeıdegi bankterden esh aıyrmashylyqtaryńyz joq dep aıtamyz. Biraq qurylys salasynyń kópshiligi ashyqtyqqa umtylmaıdy. Biz munyń aýdıtorlarǵa belgili bir ákimshilik shyǵyndarmen, halyqaralyq standarttar boıynsha tıisti eseptilik júrgizý shyǵyndarymen baılanysty ekenin túsinemiz. Dese de bul kórsetkishti tómendetý úshin erejelerdi birlesip ázirleýimiz kerek», — dedi Altaı Kúzdebaev.

Spıkerdiń aıtýynsha, elimizdiń toǵyz óńiri múldem ashyq emes, ásirese Qaraǵandyda zańsyz mámilelerdiń joǵary paıyzy anyqtaldy. Sonymen qatar, ashyqtyqtyń eń tómengi deńgeıi Almaty, Astana jáne Shymkent qalalarynda baıqalǵan.

Qazaqstan Turǵyn úı kompanııasynyń ókili úlestik qatysý týraly zań aıasynda qarajat tartýdyń úsh zańdy tásili bar ekenin aıtty.

«Birinshisi — qurylys salýshy úıdiń qańqasyn turǵyzar kezde ákimdiktiń ruqsatyn alýy kerek. Ekinshisi — ekinshi deńgeıdegi bank qatysarda ákimdiktiń ruqsaty. Úshinshisi — Qazaqstan Turǵyn úı kompanııasynyń kepildigin berý. Osyndaı úsh zańdy ádis bar. Osy úsh tásilmen satyp alǵanda azamattar Qazreestrdiń aqparattyq júıesinde tirkeletin úlestik qatysý shartyn jasasady. Qurylys kezeńindegi qalǵanynyń bári zańsyz», — dep túsindirdi Altaı Kúzdibaev.