Qazaqstanda úkimettik emes uıymdardyń áleýeti joǵary - Erlan Saırov

NUR-SULTAN. QazAqparat – Jahandaný protsesteri aldymyzǵa kóptegen talaptardy qoıyp otyr. Bul týraly Dúnıejúzilik úkimettik emes uıymdar kúnine oraı ótken is-sharadan keıin QR Parlamenti Májilisi depýtaty Erlan Saırov málim etti, dep habarlaıdy QazAqparat tilshisi.

«Qazirgi kezde Qazaqstanda úkimettik emes uıymdardyń damýy úrdisi óte jaqsy kele jatyr dep aıtýǵa barlyq negiz bar. Óıtkeni tek ortalyqta ǵana emes, sonymen qatar aımaqtarda da Qazaqstannyń áleýmettik-ekonomıkalyq, rýhanı máselesi boıynsha kóptegen osyndaı uıym jan-jaqtan jumys istep jatyr. Árıne, ómir ózgerip jatyr. Sondyqtan osyǵan baılanysty úkimettik emes uıymdardyń baǵyty men baǵdaryn baǵyttap otyrý kerek. Meniń oıymsha, qazirgi kezdegi eń negizgi trend – ol áleýmettik jelide, naqty qoǵamdyq ómirde pikirtalas mádenıetin kóterý, tózimdilik pen adamdardyń ózara syılastyǵyna mán berý», - dedi E. Saırov.

Onyń aıtýynsha, jahandaný protsesteri aldymyzǵa kóptegen talaptardy qoıyp otyr.

«Solardyń biri – ózimizdiń rýhanı kodymyzdy, qazaqylyqty saqtap qalý. Osy máseleler aıasynda áleýet ósetin bolady jáne ol zańdy qubylys. Sebebi qazirgi kezde úkimettik emes uıymdar halyqaralyq deńgeıde ekonomıkanyń bir salasy bolyp esepteledi. Menińshe, elimizde áleýet eleýli túrde artady», - dedi Erlan Saırov.

Osy oraıda depýtat Prezıdenttiń reformasy aıasynda kóptegen ońtaıly ózgerister bolyp jatqanyn atap ótti.

Aıta keteıik, búgin Aqparat jáne qoǵamdyq damý mınıstri Aıda Balaeva úkimettik emes uıym ókilderimen kezdesti. Іs-shara jyl saıyn 27 aqpanda atap ótiletin Dúnıejúzilik úkimettik emes uıymdar kúni aıasynda ótti.