Qazaqstanda UBT-ny aǵylshyn tilinde tapsyrýǵa 200 túlek ótinish berdi

ASTANA. QazAqparat - Qazaqstanda osy jyly tuńǵysh ret Ulttyq biryńǵaı testileýdi aǵylshyn tilinde tapsyrýǵa ruqsat beriletin boldy. Bul týraly OKQ-da ótken baspasóz máslıhatynda QR Bilim jáne ǵylym vıtse-mınıstri Ashat Aımaǵambetov málim etti, dep habarlaıdy QazAqparat tilshisi.

Bıyl Ulttyq biryńǵaı testileý 167 ortalyqta, atap aıtqanda JOO bazasynda 48, kolledjer arasynda 3, mektepter bazasynda 116 orynda ótkizilmek.

«2018 jyly UBT 15-shi ret ótkiziledi. 2004 jyldan bastap, 14 jyldyń ishinde oǵan 1 mıllıon 600 myń adam qatysqan. Jyldar óte kele testileý júrgizý tehnologııasy únemi jetildirilip otyratyndyǵyn atap aıtqymyz keledi», - dedi Ashat Aımaǵambetov.

UBT-ǵa qatysý úshin ótinishterdi qabyldaý osy jyldyń 10 naýryzynan 10 mamyryna deıin júzege asyrylady. Testileý aǵymdaǵy jyldyń 20 maýsymynan 1 shildesine deıin ótedi. UBT 5 pán boıynsha júrgiziledi: 3 mindetti jáne tańdalǵan mamandyǵyna sáıkes, 2 profıldi pán.

«Eń bastysy bizdiń aıtqymyz keletini - bıyl format ózgermeıdi. Biraq, qalaı bolsa da keıbir jańashyldyqtar bar. Eń birinshiden, bul - aǵylshyn tili máselesi. Bizge aldyńǵy jyldan bastap óte kóp ótinish kelip tústi. Sondyqtan, bıyl aǵylshyn tilinde UBT-ny tapsyrýǵa múmkindik berip otyrmyz. Jalpy, UBT ótkizý úshin testter búgingi kúni daıyn. Bir apta buryn 200-ge tarta túlek aǵylshyn tilinde tapsyramyn dep ótinish bergen bolatyn. Árıne, bul kórsetkish kúnnen kúnge ózgeredi. Áli de mundaı ótinishter bolady dep oılaımyz», - dedi Ashat Aımaǵambetov.