Qazaqstanda ýaqytsha turyp jatqan reseılik alaıaqqa 1,6 mln teńgesin aýdaryp jibergen

ASTANA. QazAqparat – Aqmola oblysynda valıýta aıyrbastaýdyń «tıimdi» jolyn usynyp, reseıliktiń 1,6 mln teńgesin aýdartyp alǵan kúdikti izdestirilip jatyr, dep habarlaıdy QazAqparat Polisia.kz saıtyna silteme jasap.

Qosshy qalasynyń polıtsııa bólimine Tselınograd aýdanynda ýaqytsha turyp jatqan Tıýmen oblysynyń turǵyny – Reseı Federatsııasynyń azamatynan ótinish túsken. Áıel adam 3 qarashada Telegram áleýmettik jelisindegi chattardyń birinen «tıimdi baǵam boıynsha rýbldi teńgege aıyrbastaý» týraly habarlandyrý kóredi. Ol habarlandyrý avtorymen baılanysyp, 72 myń rýbldi teńgege aıyrbastaıdy. Osylaısha, alǵashqy mámilesi sátti ótedi. Keıinirek er adammen kezekti valıýta aıyrbastaý týraly kelise otyryp, jábirlenýshi onyń shotyna 237 500 rýbl (1,6 mln teńge) somasynda aqsha aýdarady. Osy qolma-qol aqshany alǵan kúdikti óziniń qurbanymen arasyndaǵy jalǵyz baılanys quraly bolǵan Telegram arnasyn óshirip tastaǵan.

Qosshy qalasynyń polıtsııa bólimi osy fakti boıynsha QR QK-niń 190-babymen (Alaıaqtyq) sotqa deıingi tergeý bastady. Kúdikti adamdy anyqtaý boıynsha jedel-tergeý is-sharalary júrgizilip jatyr.